朗聲四起

Yo ka’emang ho ano manga’ay ko romi’ad pa’efer to fasiyaw, maiyof sa no fali masoniay, matongalay ko kahemek. Ano roma i, miletek to kilang misanga’ to ‘acocol, awaay ko ni’acaan a tasalamaan sahetoay ono niyah a misanga’an, orasaka, awaay ko tolas no hemek a misalama ato widang, ano manikanikaw ko ’orip itiya awaay ko tolas no tawa matomes i faloco’ konini a hemek.

O dadaya sato i, itiya away ho ko tilifi, saka maherek a malafi mikipapotal ko paro no loma’ a maro’ a malaholol, kaemangay ’i’ir sa a maro’ mitengil to pakongko ni akong. o roma i,misalama kami to malalimekay, ano ca pacofcofen to nanom i ’epong no tanikay, saka’alolan sa ko tanikay sadak sanay nani ’epong, ano adihay ko maalaay a tanikay todohen niyam a komaen tadafangsisay a kaenen. To’emanay ira ko katalawan a kawas caka saan itiyaho dengan o hemek.

Itiya, awaay ho ko dingki, saka, o simal ko dawdaw niyam, o fiyafiyaw sahetoay o simal ko dawdaw. Ano o kasi’enawan i, taliyoken ko tangiroan a mingiro i laloma’ santo pipodac han to kodasing, ano ca mitamek to konga. Ma^edeng falo ko toki i, mafoti’ kami. Mahaenay ko ’orip niyam matomes no tawa ato hemek.

To ikor to i,misatokay to ko tamtamdaw no niyaro’ay, mihakelong ko wawa a talatokay, itini i tokay adihay ko tosiya ato otofay i papotal o katalawan to konini, orasaka,to romi’ad matayal ko malitengay pala’edef hananay ko ka’emangay i loma’ caay ka pasadaken.

Malaliyas to ko akong ato mamo a ma’orip, ano roma a romi’ad tayniay i tokay ko akong ato mamo a minengneng tamiyanan, nikawrira, caay ka pakapi ko romi’ad sapinokayan to taraniyaro’, matenes ko pikalic to cinamalay tada marorayay to ci akong aci mamo. O matiniay a ’orip i, caay to kafana’ to fangsis no sota’ ato radiw no kilang.

小時候，天氣好就去放風箏，風吹時會發出聲音，增加樂趣。有時會去砍樹幹做陀螺，在庭院競賽。當時玩具都是自己做的，樂趣無窮。當時没有電視，吃完晚飯家人都在庭院聊天，小孩聽阿公講故事，有時也會玩捉迷藏，有時拿水去灌蟋蟀的洞。跟朋友玩耍是我們美好的記憶。

當時家家戶戶都點煤油燈。冬天我們就圍爐烤火取暖，剥花生，烤地瓜。小時的生活就是這樣充滿快樂。都市生活的小孩子感覺不到土地的芳香、也聽不到樹林的歌聲。