朗聲四起

Phiyug sapah ka Truku sbiyaw o ini smhmut musa phiyug sapah, asi ka saan bi plealay kmeuruy mneglngug phyugan sapah hug? Saw aji daun sunu ni rngsux, kiya o “siyaw yayung” ni “siyaw ayug, ” malu bi pspahan o “mhiyang” ni “mspngpung”, deedaan dha gmraka eiyah pais, rudan Truku ka phyug sapah o aji wana aji hyhuya nniqan ni hhtur eiyah pais uri, nasi hmjiyal ka pspahan do musa kmealu pbiyi hiya ni mtaqi hiya mk2 rabi psmiyah spi, qmita malu spi do mangal 3 btunux prqda hiya.

Knkla kndsan rudan Truku ka rqda 3 btunux, kiya o pnspuan tama, bubu ni laqi, ranaq tahut pnaah rqda o pnsblaiq , mggealu ni meuxul.

Qmita malu spi ka tnsapah o mlawa dlutut miyah dmayaw phiyug sapah ni kmeaguh smgasut miyah smmalu sapah, phuqil rudux ni plaqan na dara rudux ka rqda ni qngqaya djiyun phiyug sapah.

Rmngaw ka smgasut, “Utux mcinun ,hini ka snruwa su pspahan, saw mha tpusu ni tgblaiq meudus hini ka laqi su, iya yahi kmrasa ka kndsan dha wah, nasi su yahan kmrasa do aji empskila hini ka lqlaqi da, sus Bari” msa.

Babaw smnegasut do musa maduk ka sdsnaw ni uqun dha miyah mqaras smmalu sapah, meuyas ni rmgrig.

Rudan Truku sbiyaw ga, qnhdaan smmalu sapah o kingal paru bi qrasan, tnsapah ga, psramal msinaw seepuun dha mimah, mlawa kana seejiq alang ni kmeaguh smgasut ni aji uri o mdudul alang.

Asi ka phuqil kingal mneudus babuy, nii o kika “prngat,” pusu smqaras quri utux tmninun ksun, prngat o jiras niqan sapah nniqun da, pnlawa na eiyah kana lutut ni dlupung mseupu mqaras, gmdara babuy ga pllayun smiyus qnslan kngkingal hangan hiyi ka utux tmninun, lbuun rnabaw qhuni tamaul saan pqsul lqlaq muhing dnamux uyung.

Saw nii ka rnngaw msgasut, “Mqaras nami sunan mgay su malu bi sapah ni nniqan nami, tai saw gxiyux qhuni mgdhug ka sapah, ptasil ka dxgal aji hyhuya, empsgeegul tgblaiq mniq hini ka lqlaqi, ungat empkrasa dhyaan o pstama nami sunan, brahaw su balay.sus bari.”

Hi na do mseupu mkan ni mqaras mimah ni rmgrig. Saw nii ka uda sbiyaw.

以前不會隨便蓋房子，要先尋找、觀察適合的地方，會不會發生大洪水及土石流等等，不適合的地方是河水的兩邊及峽谷。祖先蓋房子前會先找適合的地方，蓋小屋睡兩夜等夢，好夢就拿三個石頭做爐灶，三個石頭爐灶的火燄產生愛的祝福。

屋主邀請親戚朋友蓋房子，請祭司做祭儀，祭典結束後也會有慶祝家屋完工的慶典。祭司說完祭詞，全員一起吃、喝、及跳舞慶祝歡樂。這是古時傳統家屋的建築完工的慶典。