朗聲四起
izua za kisanzemuga a vavayan, tjengelay a sematjumalji ta qinaljan kemin tua tjananguaq a nanemanemanga tu sizuga. izua qadavan djemaladjalan a pakakiqeneqenetj tua palingulj, manu kemasi cadja pacunan a macidilj a caucau namaipuq i pagidigidi tua sanrinsiya. mekelj a semazua sa tjapisi a qavan: “djisang gacalju !gacaljau !” kacuayanga kigalju a djiruac ta maca, kaw pagalju a lukai: “maqusau aken izua su zaljum?”, aza kisanzemuga sucaqevan a dubing sapatekeli , utauta malap ta pinikabang a alju sa pakani, ikacuay pugarang anga za ramaljeng.
kasepapaulingaw, patagilj a ljemulju ta baculing, livadrek za vavayan sa kitjavilivililj i likuz, patje masulem kiciuciul ta ramaljeng a sematjumaq. kapacunan a umaq namaqamaqal a ljinaviya, sa kivadaqi:“ udjisang amin sun? neka su taqumaqanan ? ” ti ramaljeng remataladjan a mapaula qivu: “naizuangata ku valjaw, ljakua macay ka pualjaljak, izua macidilj a ku aljak a uqaljay, pakasavaqal ta u sengsengan, ka makakitulu ta kucung kitjukuda tjimadju liawanga cavulj.
kemasizua nuizua zikan, ljaki neka itjumaq ti ramaljeng, siveli ta kakanen sa sipalimasudj a kinaizuanan. izua tu kaljavuceleljan a kalevelevan pusaqetjuan tua vicuka a gang ti ramaljeng, kemeljang tu ika ladruq anga nasi, kipusaladj taza vavayan tu kemin ta aljak. pu“ui” timadju. vaivaik a pacacikel a kivadaq tua timaimanga, ljaku ika makadjumak, inia uri makakaljava lemavut ta nasi ti ramaljeng.
pakaceveljen, aza vavayan sa vaikanan mata umaq a kiliyus sa qeljevi , naqemiladj itua qaqerengan a pacucun tua sasing nua ramaljeng. ka uri migacalj semalaput ta sangel, djumaken a sinan tigami tjaimadju, celaken sa kisupui, maitucu a vecik: “masalu tua su kinilalaingan, ika sun a suqelam tua u sasequan, neka u sipapukining tjanusun, amin za katang, ulja nutjaivililj djemumake sun ta nanguanguaq a cemekeljan.” qemaung kamaka kisupu aza vavayan.
kaw vaik pacun ta siaya katang, kasucaqevan sedjelj a qauzung,vavungec, kulavaw mintjus sa mintulutuluq, kamatjatju kavilad za qatjuvitjuvi, sicaca itua katang a nemanga, manu pacunan a haku, kacelaken sedjelja king. saqetju a varung nimadju. kiculjaculja a ljemulju ta baculing, kiqauzeqez a cemuking, ulja nu mangetjez a aljak sapacun, ika semanpaqeteleng tjaimudju, paulan anga ca namaitucu a kininemeneman.
一位畫家女孩喜歡四處尋找靈感，某天發現一位倒在三輪車旁的老人，急忙給水與食物救了他。老人孤身拾荒為生，家破舊、無親人陪伴。女孩自此常帶物資探望，幫忙整理家務。某年冬天，老人罹患胃癌，臨終前託女孩尋找失聯的兒子，但最終無果。老人去世後，女孩在他家打掃，發現枕頭下的信，信中感謝她的陪伴，並提到留給她一個米缸。女孩打開米缸，先是驚見蟲鼠，倒出後卻發現藏有金條。原來老人省吃儉用拾荒，只為等待兒子回家，不被瞧不起，令人感傷。