朗聲四起

cyunga qnxan na ita Tayal ga blaq calay. ini piyang moyay mtiyaw. baha hmcwa, ana nanu yaw ptiyawun ga qutux qalang si psqun mwah mtiyaw. ini kusa maha isu ga isu, kingan ga kingan. qutux qalang ga si psqun mqumah ro msqun maniq.

maki qutux ryax, akya Ipay mwah phapuy nniqun na qalang naha qani. Ipay qani ga mkmux hayi ro smoya musa mcisal tanux. trang ryax qaca, nya ini qbaq ryax mcisal tanux ro si ski llungun nya qa yaw na phapuy qani lga, memaw mnkux la. si giway ktlyung usa nya phapuy muyax. ro tqqoh calay phapuy mami trakis. phapuy mami trakis naha qani ga, magan bwax trakis puyun lga mtngi qabax cquliq na qutux qalang naha qani la. lmnglung qa Ipay qani maha, gbyan ga phapuy cu minqutux loyi, aqu iyat cu qblaq musa mcisal tetanux babaw knryax qani loyi. wal maha kya lmnglung lga, si agal nanak kinbaqan qa tunux nya. mpux qa bwax shapuy nya. ana uyi ga tpihun nya qa biyok ro akya pu’ing nya qa hbyatun ga, ini hiya ya, papak na biyok kutan nya hiya. akya nya maha teta piyux qa hnapuy nya he na qsinux qani ro msthay lga, giwan bung na nniqun gbyan maha lmnglung.

si ktaliy qa hnapuy nya mami qani, gwahan nya umk qani lga, nya si kntu mlaka qa piyit. ana biyok wal nya kutan papak qaca uyi ga, memaw mtwayak mgyas ro halan nya pquyu qabax ana nnanu na qqsinux qa yaw qani.

garing kya lga, wal m’iyux qnxan na ita Tayal la. smoya ta maniq trakis ga, nanu si ga lokah ta mqumah, mica qa musa mtngi ktu ta. ana ga, piyit qani ga lokah calay mwah maniq trakis. ini klhangi lga, soqun nya maniq la. ana nnanu na qqsinux uyi lga, ini the mwah ksobeh cquliq la. si tlqeng kya rgyax. nanu smoya ta maniq qsinux ga, si ga lokah musa qmalup kya cka rgyax qa mlikuy Tayal.

從前，泰雅族的生活是過得輕鬆自在，所有事務都由族人共同完成。

某天，輪到Ipay來打理三餐，Ipay生性懶散又好玩。這天，她照樣出去玩，突然想到做飯一事，便急忙回家。但異想天開的她以為將五粒小米足以餵飽族人的量改為十粒，以便一次解決兩餐的份；拔山豬身上一根毛即可煮出一餐的量，她竟直接將豬耳朵砍下，天真地以為可以煮出兩餐的份。結果，鍋中飛出麻雀，動物遠離人類。從此族人得努力耕種，勤奮上山狩獵，才有小米及肉可吃。這就是懶惰的代價。