朗聲四起
Muda smalu kmalu balay ddaan ka kndusan mu diyax sngayan u kiya ka “Muru nanaq kndadax lnglungan mu.” Kiya qnita ku nanaq ka saw diyax sngayan nii u mtna balay kingal“ ini slayi ana manu ooda.” Quri kingal iyax sngayan nii, maku balay chdil ka pyasan mniq sapah pyasan, iyux ku balay psshngak u uka bbalay ddiyax, kiya sntangan mu kmuda ku manu u kiya“Muru nanaq kndahdax lnglungan mu.” muda ana manu ooda!
Ya hmuya pa? Diyax saya qmita ku ana manu awu mu bay qtaan kana. Enduwa ini ku biyaw mtutuy ka kddiyax, saw saya daw wada ku mscuqi hari mtutuy da, lnglung ku nanaq ka yaku, ma taway bay kmalu kndusan ka saw nii da wah? Dhuq balay diyax sngayan, kuxul mu balay ka tuhuy tnsapah mu musa mkksa rmiwaw tapa ddeynsiya nganguc, adaw tapa ku ddeynsiya u clokah balay mi malu bay ka kuxul mu.
Uxay uri u taapa ddeynsiya ciida tduwa qmita kkluwan hhana, ssudu, qqhuni ddwiyaq mi yyayung klelu, saw nii ou balay qqtaan u qrasun balay mi knmalu balay ka lnglungan! Duma uri u mtuhuy ku tnsapah mu musa nami pskbiyax hiyi undonba sapah pyasan uri, saw ka cmbu boru, tmalang mi tmapaq qsiya dnii…, saw yaku u lmlu hiyi ka kuxul mu balay, adaw malu balay ka mtmring hiyi. Kiya pqluyun na kana ka naqah mring doku, saw nii lnglung u kiya clokah mi taway kmalu balay hiyi ka soni da wah!
Duma dsediq smkuxul balay musa empulah rmiwaw alang eicil, duma u smkuxul musa mkksa llmiqu mi snknux malu hngak. Saw laqi rrisaw saya smkuxul musa Wanka cmbu teyntong, duma u smkuxul nanaq tssu mniq sapah ini ksangay qmita treybi, maku balay cnhungi mkan idaw, uxay uri u ini na bay psangay ka doriq na, maku balay dhuq mnarux mi naqah ka hiyi na. Saw nii ini balay psangay ka hiyi na, maku balay dhuq mrdax embanah deynki krrinah smliq hiyi, kndudul miyah ka ou lnlamu narux. Nasi soni ini tblayaq qnlahang naq qnuudus na da u musa so snkrawah balay! Uka balay ana manu ririh ka kndusan saw nii da? Kiya ita sediq asi ka muda ta nanaq umaaw mi smalu nanaq kmalu ddaan ta kndusan diyax sngayan.
Saw saya, Ita dsediq ou balay kluwan ka quri ddaan ta kndusan diyax sngayan, ana nanaq tweinu ka ddaan ta diyax sngayan, pusu na balay u tduwa pkmalu hiyi mi pskbiyax hiyi, uxay uri u tduwa pkrana knkla ta, kiya ka sun muda umaaw kmalu balay diyax sngayan ka nii da.