朗聲四起

a i qinaljan a qaqunuan, kasicuayan neka saliman a dingwa. tazua a vangavangan amin za makakiqilja kata tjemuljuk ta qaciljay, nu cuayanga malap tua namalaic a asaw nua saviki a livuljun, sa sanpipiven. nu tima makilu a kizanki, avanu timadju a penipi tua na djemameq. au pivavaven sa saljapi a penalingulj tua kasasavan nua umaq. izua tjamalutjuk a salasaladj nucuay anga sipaqeteleng a pakata qaciljaciljaing a djaladjlan, aza ivavaw ta sinan pipi a saljap, nucuayanga macekecek a djilj ta qaciljay, migacalj a pakilimu. kaw sipadruqaqa na penipipipi kata mapuljat.

izua tu sinekezan na kungkuan a masulem, ti Akay maciul kata ljaqedi a qaqunuan a kivangvang ta maqaqilja. ka malevaleva icengceng tiamadju, manu secevung ti Akay ta kina kemasi vavuwa matjumatjumaq, pacunan na kina timadju, qaqivuing,“Akay! anema su kudakudin imaza, masulem anga  tjumaqu. ali maya kivala!.” na sakivangvang anan ti Akay, ljakua malekutj tu makiljinga ta kina, maitazua kicakaw a kiciul ta kina sematjumaq. kaw aza salasaladj nimadju izuanan a kemikim tjaimadju.

kamatjumaq ti Akay lingelingen na kina tu lemalja, ka maka pecungu sa lalja ti Akay, tjumaljan a kina tu savaik anan a pasepualang tua salasaladj tu ika maqati anga kivangvang timadju. manu kamazua sa tjevuta za ti Akay, aza salasaladj maitucu a qivu tjai akay,  “Akay! namainu sun a kiqilja, macaqu angata sun a kiledu.”kalemangda ti Akay djemeli a kemereng , sa qivu taza salasaladj nimadju. “na vaik aken a matjumaq a pecungu tu silalja. ”aza rangi sa kemelem tjaimadju ka lemangda.

nu tja varungen a sicuacuayan a sikivangvanvang sedjelj a hinacumi. aza hacumi a vangavangan inika sina paisuan. kemasi ta pisay a ljevavaw ta kasiw aya, zemuga itua qipu aya, venuljuq ta qaciljay aya, djemakadjak ta kangkang, djemapes ta gumu, venalidi ta caqeve na dalilj, penacinku ta qayaqayam. liaw pinacacukulukulu, ika masupil ta sikivangvanang. tazua tjaliaw a djeli, keri a qaung, ika malivu. a sikatevelj amin za kinemenem tu anema uri kivangavangan a siaya. nu tja kinemenemen bulay angata za cinalivatan tua kinaiqaqunuanan. tucu anga ziday, wanglu kata saliman a dingwa sikivangvang nua kakedrian.

aza vinarungan ika mamaw anga tasicuayan, sevelivelic anga patjatjengelayan nua timaimanga.

以前沒有手機，我們玩捉迷藏、石頭、檳榔葉遊戲，輸的人當「司機」拉贏的人，調皮的會故意拖過石頭讓人跳起來，笑聲不斷。一次放學，Akay正玩捉迷藏，媽媽回來叫他回家，他怕被罵偷偷跟回家，燒完開水又跑回去告訴朋友，大家笑他躲得好，氣得想打他。那時的遊戲都是自創，不花錢，爬樹、畫泥土、踢鋁罐、跳橡皮筋、射小鳥，快樂單純，彼此不爭吵。童年時光雖簡單卻充滿情感，如今科技取代互動，童年的純真與歡樂漸行漸遠。