朗聲四起

tjengelay a’en a zemuga kemasi qaqunuan. ulja nu zemuga mesaceqalj a ku varung. maqati a minseg sa kinemenemen tua nanguanguaq a sengsengan, tauta mebulay a tja vinarungan.

aza ku sinsi na qivu anga tjanua’en a maitucu, “ maya marekutj a zemuga, aza zuga nimitja kininemeneman, nu anema su vinarungan, anema su pinacunan, ika tja sikiqezelj, rakac itjen a zemuga pitua qadupu ”. aya timadju.

avan sika tjengelay a’en ta kitulu tua zemuga. aza zemuga pakaleva angata tjanua’en. saka maqati a’en a kileqeleq a pacun ta maretimalji a quljaw itua tja palingulj. namaya tua cangiangia a ljavek, paru musilasilak a qerepus nu qemudjaqudjalj. mamaw tua liljualjuas i kavulungan. paru na ni kama pinecungu a vuteqiteqilj a cevulj, namaya tua siniapu ni vuvu a qudjidjilj a angalj, paru na tjavulung a kaka a vavayan ladruadruq saka qucengecengel a quvalj, izua maretimalji a quljaw a qaljic nua caucau.

kasicuayan, macaqu a penatjez sa vencikan tua cinalivatan nia vuvu. macaqu a semenay katua pakulalu, macaqu a temeqic katua cemepu, macaqu a cemusu tua qata, macaqu a seman umaq tua ljinaviya. ljakua mapulju a zemugazuga. avan sika sedjelj a kemasi tua linangandan a tjaucikel a tja sikeljang tua likisi. tucu anga cavilj, a tja sikac tjevutanga dingwa katua sasingki. avan madjulu anga kiruku ta liaw a sengsengan nua tja palingulj. ljakua amin a zemuga maqati a tja kigaljuin a pacun, sa djemumak taza kakerian a nanemanga. pakatua saliman sa vaik a zemuga tua nasemamalji, manasika aza zuga na padjadjaljudjalju tua tjaliaw a seljecan, saka izua maljian a patarevan.

tucu, saljinga’en tu sanzugain a pinakazuanan nua sikac i qinaljan. zemuga tua liaw a vitjuqan i kalevelevan nu ljazuanga vengin.  zemuga tua gang katua vuljaw i pana, zemuga tua djuljat nu maljeveq. zemuga tua djulis nu kaljakesan itua quma ni vuvu i dremedreman. zemuga tua dringay a sinidjameq tua lava ni vuvu i tjaiwan. zemuga tua kinsa ni kina a sanguanguaq a pinuljacengan.

ulja nu tjaivililj saka pacunitjen tua aicu a mareka zuga, maqati anan a mapaqenetj taza bulayan na qinaljan imaza i tjuabar.

從小我就喜歡畫畫，畫畫讓我靜心，回想美好事物。老師也常常鼓勵我們勇敢畫出心中所想。透過畫畫，我學會觀察生活中的各種顏色，如海的藍、雲的灰、山的綠、煙的白、長髮的黑與皮膚的色澤。如今科技進步，手機隨手可以記錄，但畫畫能讓人用心觀察，細細描繪獨特之處，傳遞溫度與意義。現在，我希望用畫筆記錄部落的生活，星空、溪流的毛蟹、五年祭的福球、田裡的紅藜、山裡的飛鼠和陷阱和家中的搖搖飯，好讓人們想起美麗的土坂。