朗聲四起
ita ku mrkyas ru krakis na Tayan ga, p’es ta mkyanux sku kwara ta. iya hmut mnglung sku ya’eh yaw, iya kngungu tkba sku g’anus yaw, iya psya’eh c’oli, iya skruy ya’eh yaw na babaw uraw, kngiyat ta mtiyaw ru p’es ta mkyanux.
kruma la’i mrkyas mnglung maha, ya’eh tunux maku, ini caku kba m’was biru. ana ya’eh cikah tunux ta ga, iya kya’eh lungan su, yugiy lungan su mnglung maha, ana caku ini kba hayi m’was biru ga kyan ’ba maku ru kyan sa’ing kakay maku. ble tkba sku kle ana nanu kikay, babaw nya ga, thoyay ta kle haya, kle otobay ru, thoyay ta pc’rux kle sali, ru kle tenaw.
utux loyi ga, ita kwara lla’i mrkyas na Tayan ga, iya ci yngiy sku bnkesan na Tayan ga snbilan ta nya piyux ci uraw. nanu yaca, ana ta ini kba hayi m’was biru ga, maki sa’ing ’ba ta ru kakay ta, kngiyat ta tkba sku kwara knba’an na m’omah mayah, aki ta thoyay mlahang sku kwara uraw mayah ta ru alang na Tayan. mosa m’es ci lungan ta, baha mcwa nyu ta le’un ci mlahang ru m’omah sku kwara uraw ta Tayan. thoyay ta pranga sku ita nanak, ru pranga sku kwara c’oli ku nya mwah mbayi sku mnuhi ta ru knloh ta ana nanu nni’un.
nanu yaca p’es ta mkyanux ku kwara lla’i na Tayan. ini ta psya’eh c’oli ga mosa ta m’es ci mkyanux. ini ta skruy ya’eh yaw na babaw uraw ga mosa ta m’es ci mkyanux. piyux calay ya’eh yaw na babaw uraw hani, kruma ga mtux nni’un, mani iyu, stutoh, nbuw uwaw…, kwara ya’eh yaw hani ga mwah mtheri sku lungan ta ru kbuci he ta, nanu yaca iyat ta thoyay m’es mkyanux.
ita ku la’i mrkyas na Tayan, kba ta m’was ’was na Tayan ga iriy lokah m’was, kwara c’oli nyu maki babaw uraw hani ga, aki naha pungan sku myasa ’was na ita Tayan. gmalu lungan su mita c’oli ga iriy usa mita sku cyu ungat yaba yaya naha lla’i, ru ungat c’oli mlahang na bkis. ana ima c’oli texan su maki babaw tu’i ga, psya r’yas su mita c’oli. ita kwara la’i mrkyas ru krakis na Tayan ga, utux utux ryax maki ta babaw uraw hani ga p’es ta mkyanux kwara.