朗聲四起

Masa habasang dau hai, aiza a tacini pingaz tu uvaaz, mazima mas itutunali tu dangian mas vaivivai haiav aat manauaz tu ulus. Mililiskin a saia tu hadang amin a saikin dangian mas maupacia manauaz tu ulas. Aupa mais maupacia hai namahtu a saikin min’uni mas mastaan manauaz tu pingaz, aat manaskal a isaicia is’aang.

Paha, mais haiap a saia tu mapavali a tunali mas uluscia hai, idinglan a saia samimiing, mastatala tu mais kanahtungin a tunali’a makaia mas mahaiav tu uluscia, aat mudaanin hai kaudiip a saia madamudamu mas uluscia, minsasaan mais painukun mas saicia tu mu’iav.

Cis’uni tu mazima a saia mas manauaz tu uluscia aat na’asa a saia usizaan mas uluscia. Aiza tu haian, haiap a saia tu mapavali a tunali mas manauaz tu uluscia. Paha idingalan a saia sasadu. masa mudaanin a tunali’a hai, makanmimiing a saia kaudiip tanghaiu mas uluscia, aat macinsuu macisbai.

Aupa nii a saia asa haiapun tu tanghaiu mas ulus, aat kausian ludun tunghabin, musasu idiip a saia mainuk mas manauaz tu uluscia. manaskal a isaicia is’aang aat tupa tu, maza saikin laupaku hai isian asangcin mastaan manauaz tu pingaz.

mais labianin hai kaazin a saia kausian ma’azung’ung tu lukis masabah; mais makazav hai sikamuzut sian lukis tu lalaak tunghabin.

Maupacia a saia sian luduncia, mais masauzang hai maun mas kaununkaunun anis ivutaz; mais sanavan hai isian ma’azung’ung tu lukis masabah; mais makazav hai sikamuzut sian lukis tu lalaak. maupacia isaicia a tastuhanian sininhumis.

Haitu mudaukdauk a dihanin iskazav, musasu tu muvazisvazisin a ulusa. Paha, mais taunasia cingmut hai kaazin a saia tatauhtauh. kananuun mas saicia a ulusa isbaisisi sian anak’anak tu lutbu, aupa na’asaunang mapinanghat. Aipcinin, min’uni a saia mas hazam, tupaun tu “pacikaul”.

Saulaupaku mais cingmut hai mahtu a kata uta’azaan mas mahaiav tu hazam sian lukiscia tatauhtauh tu sing’av.

有位女生，喜歡鄰居有各種色彩漂亮的衣服。期盼成為最漂亮的女生。趁著有一天，鄰居掛曬完衣服離去時，就去把衣服偷走。跑到山上躲起來，試穿這些漂亮的衣服。結果，忘了怎麼回家。在山上，餓時找蟲子、採野果來吃。晚上找茂密的大樹來休息，冷時，找樹洞來避寒。天漸漸冷，衣服也撕裂破洞。冷使得牙齒摳摳的響，只好用破爛的衣服來保暖。後來，變成了一隻五種顏色的鳥，稱之為「五色鳥」會在清晨發出冷得發抖的「摳摳」聲音。