朗聲四起

kinatalrimayan na wari, sare’edan da marepana’uwa ta diya! tivutivus lra ku sare’edan kannu, muruma’ ku lra kanangku kadekalran, alralru ku semangalan di talrimayan, adi ku parangeranger da kuwaani ku kana sadu anger, mareanger ku lra a kadu u diya, mu’iva’ivat u kani i henan pataliawac, di man kemani u lra mi’edeng u lra kani i henan? lramu kirepauwa kanu anger! aymu sakuduwadu ta su’eraman kanu!

adiyu diya, malayas ta mena’u kanu musarusaruk i makalusu kana kidakiday di pudadalan u i henan, di kemedekedeng u da ’enun, mavangavang u da sasaleman di kare’aniyan da sinaleman, venavaaw u da vuyu, maymay, vulraw, harem lra mu, uniyan lra caucauwa i kani, di kurelrang ku anger marawraw.

ulra a saya ’amiyan, kana amere’ di na uniyan a saysaya a vitu’en na ka’aremengan, kurevali ta kana calringcing na vali, mitulus ku kanannu ’iray tu sadekuwan, kemakawang ta kana malikalikaw i ’ida’idang, patawatawar ta kemakawang mukuwa kananu rineca’an da pecir… muraruma’ ta lra mu, nu papadekay ku kana aludun na rawa, ku semangalan malalup ku kanangku nanayan kanantu kinaracan na lringadalan.

semangalan! lrayuwan! kemaya ku kananu ipakavulay kanangku inlrangan da tinucauwan.

adi ku lra maranger muruma’, maranger ku muvilin kani, aymu melri nu karuwa pinakalrawa data wavaawan, muvavuruk ku lra kani i dadalan mu, mituruturus kaningku na suwan i Kulo, kurena’u da makiwalray kaningku, pakunamun ku lra kimsis kanangku saduwan anger, pa’avut ku macangis! nangku ure’ kemawan kana telrisa’an kana paacev, adi lra ma’a’aci.

adu mu, kemawan ku da kinger kannu na mavavina da ‘‘Kulo, uruma’ , uruma’ lra, amana kurelrang kani iva a! kema. nangku kinasaharan i imu ya, lrayuwan ku kannu! raruma’ ku diya! raruma’ ku pulralrang kananu ’inumayan, kuy kirungecaw kemawan adiyu diya kana sadeku!

期盼的日子，想見！終於重返舊居，原本滿懷雀躍與期待，沒想到卻是蕩氣迴腸的場面，想著畢生縱橫山林的祢，為何就這麼瀟灑的安息在山林的懷抱？對祢來說是得償所願吧！對我們卻是心痛無比！

想當年，總能在釋迦果園間見到祢辛勤的身影，開闢道路，爬山引水，忙著耕種、採收、養雞、養魚，田園裡空蕩蕩的，我的心也空蕩蕩。

在一個無聲的星夜，吹著冷冽的寒風，我跟著溫暖的火把，在蜿蜒轉折的山脊，一步步朝著放置捕獸器的地點，返程的道路，我揹著笨重的獵物，心中的喜悅已蓋過了被「咬人狗」螫的刺痛感。

我何其有幸，「少年階級」能和祢走上一段刻骨銘心的一夜，讓我看見外公的智慧、勤勞、謙卑的精神與典範，衷心謝謝祢豐富了我的生命。

我似乎聽見祢呼喚著Kulo小黑狗回來！回來！別跟著哥哥下山！我最親愛的外公，謝謝祢！我會回來的！我會繼續幫祢整頓家園，讓這裡像從前一樣充滿溫馨！