朗聲四起

kadu kana ka’inavayan a kasede’an na wari, naniyam ma’idangan, kana maranger pakasemangal kanadu na kemay Tayhok muruma’ puybung di, masalr diya padang da semasahar kana’’ ipuanger da kemay i iyan a danum’’ kema.

semavalr marelrang na wadilri kaniyam kurelrang datu dinapalran na ma’idangan, kemakawang mi pasekiseki i henan.

kani i makadadalan na calringcing na vurelruwan, di na ngulringulran na ’apuc di na semasenay na ’ayam, di na vacavang a kawi, di na marekamelrimelri na inaakan na calunan mu, mau i malri na kemakedeng parevati datu ngadangadan lra, tu kakudain lra na eman diya i henan!

alra vuri’awan mi da semangalan dadu, parepengan kema temalimalima ni malri, kairayu kakaudu na viruwa i henan, amana vuri’awan kema! di tarena’u datu sever na lringadaran kema.

alra makiteng diya di, kure’uri kana calunan, kakuwalengan ta madalram mena’u, maraanger ta diya, adi repidan! iniyam na kuku diya mu, karekikarakarac mi lra, idu na nanayan pamelriyanlra kana nana! i malri payas melak kanantu tu’u na ti’adeng, di tu deriyaw mi lra, di paruwaruwa lra naniyam nanayan! madakedak ku kana kemani na pacemel a!

nu kare’a’alri ta diya, tu panadamaw mi i malri da lremawa’ penalisi kana demaway i icas di na mi’alrup, di na mihenan na midanum na viruwa diya. nu yaakan ta lra penecik ta diya pu’acar, alra miinlrangan ku lra di, kitusayhuyhu ku panadam pana’u kana wadilri da penauwa penecik! kemani kana mipauwayan na wari mu, adi mi kalaalup pataliawac kema ku mu!

長輩為了讓回鄉掃墓的親人，歡聚一場，再次安排「飲水思源」的活動，我們家族聚集一堂跟隨著爸爸往山爬坡，爸爸一路解說著山林的植物與用途！我們因雀躍不已而喧嘩，爸爸比安靜的手勢，要我們懂得尊敬山神、要注意咬人狗。四個時辰吧！抵達了曾祖父的「水源地」，用餐前爸爸彈指敬天地神的儀式完後，便述說著曾祖父闢荊斬棘的故事！並說，每年掃墓前要巡走曾祖父的腳步、紀念飲水思源之意！如此深具意義的活動，我們深深銘記在心！