朗聲四起

ka kakedrianan aken, izua za drikidrikitjan a iga a na kipaqenedjan tjanuaken. namayatucu a ljinizavan. izua a muri miperper ti kiwi aya ngadjan a qayaqyam. ljakua namaqaran sa drikidrikitj a palalj manasika masakulungan timadju. navalisaked sa singelit aravac tua miperperper i kalevelevan a zuma qayaqayam.

izua ka makatalj kisusususu tua veljeluan a kikakanen, simazan i dangas ini na pacun ka tjaisangas. na tjemaladj aravac azua dangas. pacun sa malingedjelj sa kinemenem i dangnadangas timadju patje seleman. ka cemedas sa qemerepurepus. malalailaing sa semenasenay i kalevevean a qayaqayam a pakazuazua. katazuazua, minasi a papupicul sa minpudruk a kikelu pasa dangas ti kiwi. “ya? akuazua kikelu ti kiwi lja?” “qai! mangulju aravac timadju!” matucu a penaula tai kiwi a zuma qayaqayam. isauniuni manu paqerengen a qailjungan. nu pacun itjen a kinakemuda matu miperperper a pasadjaljaljav ti kiwi. patjezua kipaljenguaq tua drikidrikitjan a zikang timadju, celaki aza namaqaran a palalj sa peluseq lja maleva, sa pasamaquliqulip i kerebaw ti kiwi.

aicu ti kiwi palemek mangulju timadju aravac, ljakua na kezeng a varung sakamaya inika maumalj a lemaing tua kinasaljinga nimadju. nu kemapaz nu kemtelj a kiqadjilj tjara venelaq sa marasi a vunavun a namaqezet tua tjagulj. talja masan malap tua varung tjanuitjen na qemacuvng sa setjelangalj a malasulasung lja kikezeng tua selapaian tua saqetjuan tua luljayan kumaljia biribirian timadju. tjara tjamasulem a qadav tua kaukav lja inika semekesekez sa galiljegilj aravac.

tjaljaparavacan a namanguaq ti masek tucu. masengsengseng tua sipaziudingding a zidusia katua sema tjaljevavav tua kalevelevan a hikuki timadju. ka patagilj a muri masengseng savid a djemelidjeli sa neka uri pusaladj lja ngulungulu ti masek aya za qaliqali. ljakua ini a tjemaula tua kinasaljinga nimadju sakamaya. tucuanga talidulidu a mapuljat.

anema su kinasaljinga? marekutj sun a maselapai? pasususu sun tua sinipaselem a djalan? ari! ljatjena mabeneq! ari! ljatjena mapasaqetju! ayatua ini ka mekudral a nakidjekec i putung a kuka, makulung a kitulay ka iniyanan na matjani itjen. tjara vavaik a kasiv, tjara temekeza a veljeluan, tjara namasevec a qelju nu sinipapuljat a lemaying tua sacemel a cinunan. ari!

有部動畫叫KIWI讓我印象深刻。牠翅膀短小無力、無法飛翔，為此沮喪不己。有天牠順著小溪覓食，來到未曾發現過的懸崖。Kiwi縱身跳下！鏡頭打橫，像極了Kiwi快速飛翔的錯覺！Kiwi享受短暫的時光消失在霧裡。牠為了夢想粉身碎骨讓人動容。被重石壓著的樹苗努力發芽，終有沐浴在陽光下的一日。跑者忍受痛苦疲累直至終點倒下。日夜不停的鐮刀，太陽都會閃避。

走！去追逐夢，就像逐獵的獵人，山林會開路、溪流會為架橋、獸徑也會為他伸直！走！