paqenetj ka kakedrian aken nu nacemavu ti kina, semekaulj tjanuamen, “sau, siljevan tjai su vuvu tjai tjama tjai tjaina aicu a cinavu.”  qau nu nakasi vavua a qinuman a vurasi a vasa, tjara pakavulj sakamaya ta ljaqediqedi. nu kasicemecemel ti kama, nu izua djinameq a sacemel, cemeged a pipaljing ta mangetjez a cemulju tazua qadaw ni kama a vavuy.   nu kaljakidjulisan mangetjez a tja ljaqediqedi pusaladj a cemuljeculj ta penaisu mudjaq ta djulis. azua djulis a pinuljacengan sa sisiaw ta ljameljam. mapaqenetj a patjetucu.

ljakua maumalj a ziday, tucu tjuruvu a kakedrian vaikanga kitevelj a ma pairang a semupu. lemaing ta varung niamadju a sikacu. aicu a kakedrian tucu mapavalitanga a varung a sipacunan a silangedan a sidjavacan, neka nu sepacengeceng ta situluan na tjaisangasangas.

tucuanga aicu a kakedrian nu veneli a ma siubay ta kakanen, nu sipangetjez i tjumaq, makulung a pacun ta izua i tjumaq a mareka cemekemekelj. makulunganga a pukanu ta matjaljaljak ta cemekemekelj, keman a kisumadju. “nu mavetu aken kiparia,” aya kininemeneman.

tucuanga aicu a kakedrian, nekanga nu papaqaljayan tua matjaljaljak tua tjavuluvulung.  nu pacun itjen a pita tinese. ui angata tu nageminagalj. nu tja cikelen a pacun a sicuayan a sikacu namaseqetj macaqu a lemangeda a kakedrian ta kai nua matjaljaljak.

aicu a masasiljevaljeva itjen i ta tja sikudan nanguaq aravac. nu semileva itjen ta mareka tja kaka, uri mangetjez a tja manguaqan.  nu namacelak a tja lima, uri mapaseqeljing a mareka tja kaka.  nu namasuqeljev a tja varung, izua tja levan.

kavala sa makaya cemikel azua tja masasiljevaljeva kasicuayan. tucu, amin a tja kemasi tjumaq kata tja kinacemekeljan a temulu ta tja aljak namakuda situluan na tjaisangasangas, mana uri pinivarung aicu a nguanguaq a kakudan. nu nakemasi tjumaq a matulu a kakedrian, pai nu vaikanga sasaw tiamadju a kitateveljan ta qaliqali, mana uri izua marepaqaljaqaljay marekiljivaljivak. azua maresiljevaljeva mana uri namaqulipanga a tja pacucunan a pita tinese a nageminagalj. ulja ini a namaqulip azua masasiljevaljeva a tja sikudan.

記得兒時，當母親包cinavu時，母親總會吩咐我們把cinavu分享給長輩。當我們有收成，也總是會贈予數個給鄰居。當父親從山上歸來，若有獵捕到的獵物，必定逐戶邀請分享當日收穫的山產。每當收穫紅藜，鄰居紛紛到來幫忙，將紅藜煮成粥配上薑湯。至今仍難以忘懷。

隨著時代的變遷，許多孩子離開部落，前往平地讀書，並融入了別人的生活模式，追隨他人的生活態度。如今的孩子已經有了不同的所見所聞，也轉變了心態，從而背離了祖先的諄諄教誨。

現代的孩子們已經失去了對於尊長的敬重。當我們打開電視，內容讓人擔憂，唯有當我們回首過去的純樸，孩子才會聽進父母的話語。

 

在生活中，分享是好的。當我們懂得分享予我們的兄弟姊妹，我們才將擁有幸福。當我們張開我們的手，兄弟姊妹們才將受到幫助。當我們敞開我們的心胸，我們才將擁有快樂。

願我們能恢復過去的分享文化，在家裡教導我們的孩子，使我們的祖先所教導我們的優美的文化能被傳承下去。