朗聲四起

mita’ SaySiyat ’ima ’akoey ka kaspengan, hini kaspengan ’in noka SaySiyat a tatini’ tinortoroe’ ’inimita’, ray baki’ ’oepeoeh na bo:ong ki koko’ maya’ noka SaySiyat koSa’en ka hinbasezan koko:ol. mita’ SaySiyat ka tatini’ rengreng patinekla’ ka ’al’alak komita’ ka koko:ol, ma’ ’am mahoero: ’in noka SaySiyat a hinbasezan.

’ima Sapi:ih piza’ tinal’oemaeh ila, yako min’alay ray ray’in kakiS’ol’olae’an kakiSka:atan kil kamakiSka:at tani baki’ ’awi’ minoSa’ hato ray ’oepoeh na bo:ong, mita’ noka SaySiyat ka hinbasezan. karara:an yami ma:tol ka ’ima kayzaeh bazae’en noka SaySiyat kapa:tol, hi baki’ ’awi’ ma’ pakSekla’ noka SaySiyat a hinbasezan ka kinbazae’an.

baki’ ’oepoeh na bo:ong ki koko’ maya’ ’ina pabasez ’ini mita’ SaySiyat. kakhayza’an mae’iyaeh kinSiyae’ o ’oka’ ka ’ima ’aewhay ka kin’i’iyaeh. hayza’ ’aehae’ hahila:, ’aehae’ tatini’ mowa:i’ ray kaSpi’ komoSa’, “korkoring, moyo ’iya’azem mina wasal ’am tirakiS ka ’oemaeh ila, ’am’amoeh Sa’ila paskayzaeh ka palono’.” ’oka’ ila o, mae’iyaeh haeba:an ’okay mari’ ka ka:i’, sa’owaz ’okik honaehnge: kawaS tomtomobi:wa’, maSna’abe’ o somibo: ila. ’inoral ’okay Sangay, tirakiS ka ralom ila, ray ’asang ’ima haeba:an kil Sinpanan ’arolon noka ralom, koza’ kin ’aewhay bazae’en.

hi baki’ bo:ong ki koko’ maya’ roSa’ ila’ nanaw tani palono’ toliyab patalay ray koko:ol. lasiya ray koko:ol ma’az’azem powa’aw ila? hini ’oemaeh yami roSa’ ’aehael nanaw ila, So: hayza’ ’aroma’ mae’iyaeh koza’ kin kayzaeh! hayza’ ’aehae’ hahila: komita’ ray wasal toliyab ka hoko’, ’i:zo’ hayza’ ’aehae’ ka korkoring, korkoring nasiya kalahangen. o tabin ’aehae’ hahila:, bazae’ noka samiyan komoSa’, “ korkoring Sa’ila tektek boeloe’i ila ha:aw wasal! honha:i’ ’aehae’ ’aehae’ mae’iyaeh ’inay wasal manakiS, hayza’ lampez o maykaSpat ka mae’iyaeh.” ’isa:a’ koSa’en ’in noka SaySiyat a Sinrahoe’.

potngor ila kan’oepoeh na bo:ong, yami’ Siyae’ a tomal. yami ma’az’azem ’am nak’ino’ taSilotor ’ima kayzaeh ka kaspengan? ma’an ray hina’azem kinoSa’ Sapang maraS ka korkoring ta:’itol kan’oepoeh na bo:ong pakSekla’ ka kaspengan, So: noka SaySiyat binSi’ tinokoeh ray ’inaz’azem, nakhini mita’ kaspengan ma’ mabasez ila, ’ana ’inowan ma’ ’amkay ngowipani ila.

賽夏族人稱大霸尖山被稱為賽夏族的聖山，學生跟隨耆老踏上賽夏尋根之旅，耆老告訴我們起源故事：很久以前，賽夏族人過著平靜快樂的生活，某天有一位長輩提醒族人要居安思危，族人們並不採信。過不久，天上開始打雷下起傾盆大雨，家園被大水淹沒了，狀況慘不忍睹，只剩兩個人被沖到山頂上，成為餘留下來的族人…。

我們該如何傳承賽夏族美好的文化？乃要親自去體驗，當文化的種子種在心田上，我們的文化就會萌芽、不會忘記！