朗聲四起

ngalungalu aravac tikina. paseqeljing i tjaptjap a na seqapqap ka kakedrianan aken.

mamav ta pulingav kemeljanga tu cemuliculi tu malevaleva tu saqetjuqetju ka inianan a qivu aken tjaimadju. nu qemacuvung tua sengesengan a matjumaq, cemuljev a gemalju tua nemanemanga sa kemeljang ki namadaudav ki namanganga aken itjumaq timadju. radjai a maca sa na ljiabar a calinga namaya ta cinunan a qemaljuqaljup tua sacemel. nu izua ku pasaliv, lemiqedev timadju sa sedjekec aken lja namasetu matu kinapalisian.

qacaqaca saka pupicul tikina. muri keman aken tua ljualju a pinivavav. sialap sa pakan tjanuken. pasaceqalj a cemiding sa semepelj tjanuaken a sema lima a tanuidalj. nu djemriuc amen, tjara mekekelj saka pungadjangadjay aken lja djaljav a djemavac tikina.

kumalji a nemanga nu temulek ti kina “pit!” aya zemaing matu penalisilisi. nu zalangzang “pit!” ayain sevacaq a vali a vucelecelelj na kemasi taljev. muri pacun tua sinbun “pit!” ayain minqut ti muni a patjekai tua pinayuanan i qailjungan. muri temekel “pit!” ayain temezateza anga kuhi a napenasalulum itua piyanlisangtiyen. amin a paljetjeku tua paisu “pit pit pit pit pit pit!” manunem a temulek. palemek tjalja pazangalan a pupalisian tua paisu kaumaya. “aku malim aken sakamaya tua siniqilja a vecik?” ayaya ti kina. anema siniqilja a vecik? aki kakanen?

“ari, djemriuciagna, siaw huang!” uzai a djemaudjaulj tjanuaken tikina. ya! aku malim a kipakeljang tjanumun. ti siau huang a ku ngadan. drusa a ku cavilj. tjaljatjengelayan a semapesap tua qipu. wuang!

我小的時候溺水，是媽媽從水溝把我救回來的。媽媽會讀心術，沒說話就知道我的心情。很厲害！她的手指頭會發出「嗶！」的魔法。「嗶！」一下就有涼涼的風、主播就會出現、商店會滴咖啡。但是提款的魔法比較難。媽媽最怕蟑螂。嚇到跳得比楊傳廣高！跑得比紀政快！大聲呼喊！。這時我會衝出來，不一會兒蟑螂就跑了。媽媽會溫柔的抱著我，表達謝意。「散步囉！小黃。」媽媽在叫我了。我兩歲大，叫小黃，最喜歡挖土，汪！