朗聲四起

Cikaupa ka hapav dalaqti tu miniqumic, cikapa ka siduq haiza amin a anak’anak ka vaivivaivi palcicia ki pasiza tu dailaz, maszang tu haiza amin mita tu Bunun pasiza tu dailaz.

Maqi pasiza a, cia ki bananaz a munha’an binanau’az tu lumaq, masatu ki babu, ciin pa’is’av i naminmavala tu tastulumaq haizang i taic’aan nai, asa tu pisbusukun, pi’abuqanun ciin pinaskalun, nanu tu nii tu maqtu haiza a iskahau’an.

maqi manaskal a naminmavala’a, namanaskal amin nai tuqumic i naminpakatuszang tu uvaz’az, maqi tunganin paka’un a, patukbaac a mavala ki qudan kakaunun, mintun pacauqisan i babu, nakonun i mavala ha’an daantun. Nakanaqtungin a pasiza tu sinluc’an a, maqtu’in pakanmavala paluluklac, maqtu’in amin a pinilumaq dasun mulumaq, maqi kalumaqin a, nii’in tu muqna paka’un.

Macalpu sadu ki laupuku tu pasisiza tu sinluc’an, asa tu iha’an bananaz tu lumaq paka’un, na’asang tu iha’an binanau’az tu lumaq muqnang luc’an paka’un, maszang i mupusan pasiza,. nanu tu nii’in maszang i itu Bunun tu pasisiza.

Maaq mita Bunun a pasisiza’a, haiza a tupa’un tu samu. Maqi laupang pasaqaal pakaviaz a, asa tu macingav i tatini tu pakatac’aan naupa, miqi tastusiduq a, nanu tu nii tu maqtu pasisiza, tupa’un tu samu, masamu mac pasiza. Maqi mitmang pasisiza ka, nakihaz i tastulumaq, nanii a inuqumican malicihal, nii amin a maikikinga makackac. Maqa masaa luc’an i pasisiza’ a, uka’ taic’aan asa muchu ciin minhamu, aupa mac paqusil i babu a, nasihamu’un ma’amin a anakanak tu taic’aan paqusil, samu anak ma’un i anak uvaz’az tu titi, naminsuqzang a tastulumaq, namikanang a inuqumican, namulatpu a maikikingna. Anangan a asa ata kapimaupa ki itu madaingaz sintaqu tu samu.

每個民族都有獨有的婚姻程序與文化。以前布農族男方會前往女方部落舉行婚禮、釀酒與殺豬，讓未來的親家高興、吃飽喝足。婚宴尾端，女方會回請男方飲料、食物，此時婚姻大事宣告完成，成為親家，男方就把女方帶往男方家，不再舉辦第二次婚禮，也沒有再宴客。

布農族傳統婚姻制度叫做samu。男女雙方剛接觸認識，一定要詢問對方是不是masamu。若違反masamu會牽連氏族，絕對要謹守與遵循。要謹記婚姻的制度、婚姻程序，謹守文化。