朗聲四起

aza pakavavavavaw ta kasiw a dingding, a kinavutjuljan tja sanguaq ta makatekuteku a dingding. kaqaqunuan aken, rukikaljav tu izua kinacu ni kama matjumaq a qanri, ljki lima, puluq maleva en tauta. nu calain ni kina pizuan ta ljameljam, kamangulj kata ljaljikan, nguljingulj a sequ. sumaya za qetim nimadju, mqaqati a tja sipatada tu liaw ta papa, masa liaw anga u kinan a pakatekuteku a dingding, avanusika neka ravac a u sakemanan. amin za pakavavavavaw a dingding, lja pazangal a kiaya, saka tjaliaw makavavaw ta kasiw, paka sikic itjeng tjaimadju.

ka itaqadaw na pulavay, u kacuin a u kaka tjaljaljak a uqaljay a pagung, kamaka caing amen ta gung, vaika men a sema ta hisiu a pukasikasivan muri kanri, manu nia pacunan a sedjelj na kiqilja ivavaw ta kasiw, ika men a lemaut ta ljavavavan. nia siaya ta namacay a ricing, sa seljusen a tjemany, ka nia supuin ika djemaljun ta tapuluq. tiamen kata u kaka izua za nia masudraman, sa vaik a maveleljuan a kibuqebuq sa kisusezaman.

kacuayanga, izua za qemeceng ta veleljuan a vinarungan, kau qivu tua u kaka:“idu karevuci a qemeceng ca tjakuljay a veleljuan, qadjaw ka izua liaw a ciqaw, gang kata quzang a maretimalji a nanemanga,” au patagilj men a semakuc ta qaciljay, sa nia qepui a vudas kata qipu, siljupetj ta ljuva na qaciljay tu ika makazua mulaveq a zaljum, palamu aza tjakuljay a veleljuan tja mekerimekri a zaljum, avanzua tjevutanga mareka ciqaw kata quzang, mintatulutuluq izua matu uduliduli, amin za gang kitju leduledu itua qaciljaciljaing, au izua men namaleva a djemekedjekep ta ciqaw kata quzang, sa nia lailaing a cemelak ta na kiqilja a gang, aza kakerikerian a ciqaw kata gang nia pavaiken, ljakua za quzang nia lapen penuljat pasa tua kaci italadj, ka u pacunan a nia kaci napapamaw anga ta lacev.

小時候，我特別喜歡吃父親帶回來的樹蝸牛，肉質比地上的好，媽媽用薑、辣椒、九層塔烹煮，美味下飯。有次假日，我帶弟弟放牛後去找樹蝸牛，但們爬得太高，只到不到十隻，感到失望便去溪邊玩水。我提議封另一條小溪分支，弟弟與我搬石塊、泥沙堆壩，水漸乾，魚蝦現身，我們忙著抓蝦，小魚與螃蟹放走，裝滿半籃子。回家後告訴母親，卻被責罵太危險，禁止再玩水；爸爸一邊偷笑，一邊誇我們聰明，還說以後想吃蝸牛他來抓就好。