朗聲四起

Mangihit bunun masaiv duma bunun i mananqat tu is’aang, maqtuin a bunun a tastuqanian manaskal miqumis. Maaq haiza mita aikas’angan a, imita sinkuzakuza mahaipi minsia, a manaskal mita is’aang. Haiza ihaan Seisiu qalinga tupa tu; maaq a naskal un a, maszang i iu, maqtu mapa’iu ki mihalang tu bunun. Maqtu ata maisnahaan mita bunun tu kaingihitan saduu imita kainaskalan. Miqumis ata inastu ti, madia kaisalpuan sin qainimumulan, paqpun atikis a kainaskalan. Haiza sinbazbaz i bunun qalinga tupa tu; maaq i mas’an a kainikuzaan a, nahaiza tu vau, siva a nitu kanaskalun mita. Paqpun makansalpu ka imita iniqumisan.

Palunqaqtung ata iniqdian namasalpu a is’aang tutupa, na isvai’an amin i tamasaz kuzakuza. Musqa tu maaq i mangihit ata maqainan a, naminmanaskal imita is’aang, na’uhaizaan ata tamasaz kuzakuza. Maaq dau ka mangihit maqainan a, maqtu usizaan i busvit siin tamasaz. Aupa maaq a busvit una maqtu aipa ma’insun is’aang. Maaq a tamasaz a maqtu mapindaduu imita tu maivai tu tamasaz. Nitu mangihit maqainan tu bunun, kaupa qanian maqanimulmul, makansalpu a iniliskinan, mahaipi panhalangan. Panhalangin tu bunun a, nitu asa maun, nii amin mazima bisukbisuk kuzakuza, nii tu asa pababazbaz i duma bunun. Mintikisin a kainaskalan ihaan is’aang.

Musqa dau ka diqanina masaiv mita bunun i mangihit tu daqis, nii a duma miniqumis saivan. Aupa nii aingka maqansiap ikma’ia. Inastu ti sikaupa ka bunun haizaan amin mangihit maqainan tu daqis, asa dau tu ikma’aiun. Aupa maaq a mangihit maqainan tu daqis una, maqtu pinaskal i bunun tu is’aang. Maaq i nitu ikma’aiun a, namaszang ata pinmama’az i diqanin ta tu sinpumazav. Saduu ata ismuut siin lukis un, maaq i kalinluvluvunin a, mangihitin aingka lasunutsunut maqaqainan. Pasaduan ata tu sikaskuaq a inaita kainaskalan maisnahaan luvluv tu sinsaiv. Tais’aan! Maaq i mangihit mita daqis maqainan a, miliskina tu nasikaskuaq a bunun nastu ti tu kainaskalan!

微笑可以帶給人們溫暖，讓人整天都可以開心的生活。

在生活中如果有目標，就想能早日實現，但過程中一定會有許多困難。因為挫折而傷心時，此時有微笑和鼓勵就能帶給你勇氣和力量；當你遇到傷心難過的事，只須微笑就可以排除憂愁的心情。

相反的，當處在一個沒有微笑和歡樂的地方，整天愁眉苦臉、傷心難過，大家可能都會為了小事而吵架，嚴重到造成社會大亂。

微笑不只是世界共通的語言，還是人們最好的化粧品，如果每個人臉上都常帶著微笑，這樣世界一定會變得更美好。