朗聲四起

aicu a i kavulungan mana kiniveqacan nua kacalisian a sevuculj, nu pitua malada pinaka i Tjagaraus aya. a sevuculj a tjaqaljaqaljan masalu angata tu azua i kavulungan mana kinaizunan nua cemas katua vavak nua sevalitan, namapaqaljay aravac namakarekutj aravac, ini tjen a makaya seman paqateleng, pai avan a sikaliav a ravac a sinanpalisian a kakudan tua sipaljakevan ta i kavulungan. avan a sika mapaljakev nua cuvuq, qemuzimuzip katua kasizuanan a cevud nua zaljum, sa sinpeljuqan aravac nua sikamanguanguaq. aicu mavan a sika valjualjut nua sevuculj a tjaivilivililj.

a pakatua milingan i kavulungan, sepuliengelingetj i tua mareka qinaljanan nua sevuculj, sa na maretimaljimalji a sitjaucikelan nua timaimanga, na temalidu aravac. inika amin a tjemljev nua i kacauwan a milingan, izua uta a milingan a pakatua kemuda ti kavulungan a venca a benulung tua zuma gadu i palingulj tjaimadju, pai sa timadju anga masan tjaljavulungan a gadu.

izua za milingan kemasi maza i paiyuayuan i qinaljan, izua gadu i tjumapaljapaljay, namaya tua i kavulungan a pasavavav. izua tu qadaw, qivu ti kavulungan a mayatucu “tisun a ku ljaqediqedi a ti tjumapaljapaljay, pai kinemenemu tu aicu a mamaw itjen a pasavavav aki nguanguaq a tja pacunan aya ? aki ika nanguaq a ljiateku itjen aya?” temevela ti tjumapaljapaljay  ui! namaya tazua uta a ku sipacunan.” qivu anan uta ti kavulungan “nu mayatazua, seljangi a ljiateku, pai tisun nai a tjaisangas aya.” ini a kemeljang ti tjumapaljapaljay tu buruburuin ni kavulungan timadju, sa masilevan timadju a qivu “ui! ulja sun a kemeljang tua ku picul aya.” pai kirimu a ljiateku ti tjumapaljapaljay. tazua ka pacun ti kavulungan tu ljiateku ti tjumapaljapaljay, inianga pasusu ti kavulungan tua rasudjan niamadju. kemeljanganga ti tjumapaljapaljay tu binuru timadju ni kavulungan, ui tu patjeljip timadju, ljakua inianga mapacikel.

pai kemasizuanga, aicu a kavulungan namasan tjaljavavavan nu gaduan i maza i akaw, namaya tua tja kina a ru paquzip, ru kiljivak katua ru papumanguaqan tjanuitjen.

北大武山是排灣族起源之處，也是屏東人的母親，因為那裏有著豐富的自然資源生態，孕育者照這塊土地上的人們。而在各排灣族部落的口傳，也都是從北大武山開始。在許多排灣族的口傳故事中，除了大洪水傳說廣為人知外，在下排灣社的口傳故事中，記錄著北大武山欺騙其他山成為最高山的經過，顯見排灣族人對北大武山的敬重，透過神話傳說的方式告訴後代子孫，其神聖不可侵犯。