朗聲四起

Kndkilan alang saya , ini pntna sow ka ncbiyaw da. Cbiyaw balay han u manu ka dsediq alang pa. musa balay mkksa rmiwaw alang brnux paru mi icil klwaan, manu ka saya daw kmniyah sediq kaalang icil ka miyah mkksa rmiwaw alang dwiyaq da. dhuq ta klwaan damay doriq dhnu.dwiyaq balay ssaan cbiyaw, saya daw ririh sow way bukuy bay dwiyaq hiya msdalih ta bay. ana alang icil miyah mi. dhiya niqan ka sediq pniyah sipaw ta Talu, niqan ka pniyah Tanah Tunux, Damay doriq mi kana ka sediq klaalang… dnii na uxay ta bay nklaan sediq klwaan daw, hini.saya, rmiwaw alang ta ana kksa nanaq ini ktna na sdiqun, ini ktna na kari uxay kiya u ini ktna waya na kklwaan, nii u asi ta muuwalu mi msupu ta kana ka ita sediq saya da, ssediq saya ida wada kndudul dalih ka lnglungan ta da. sow ka way thiyaq bay nniqan Damay doriq Amiruka, tapa ta asu skiya kingal rabi.

Miyah mkksa rmiwaw alang dwiyaq saya ka sdiqun u, ida qulung smiling quri dnuuy qqiya rdrudan ta cbiyaw, mi mkmari balay. sow ka pala tninun, lukus rudan cbiyaw mi uuqun bay rdrudan ta cbiyaw… dnii. dhiya wa mkmiyah bay smluhay tminun pala, msuupu muyas uyas mi rmwri uri. Mmtuhuy sediq alang mpprngaw kari kklaan dha kndusan ta mi kmkan hnpuyan uuqun bay alang dwiyaq cbiyaw ni saya.sow nii asi iyah mrmux alang dwiyaq saya ka pniyah alang icil sediq pa, musa uxay bay dhqun lmnglung drudan ta cbiyaw ka sow nii. cuxal balay han u uka ka waya sow nii, ini bay knhmuc musa qmqah alang dha ka sediq klaalang cbiyaw.

Nii sow kndudul trawah ka rhngun klaalang saya daw, bqanan ta qqrasun dha mi dhuq ta mssdangi kana dmi, dungus na hiya u pklaun ta balay mmanu ka dhiya hu? Pshuya ta pkla mnan mi dhuq psparu qmita kndusan ta mi knkla ta Sediq? Ida ta qulung suupu lmnglung mi tsaun ta ka dhiya, yasa Sediq ta balay ka ita.

今日的部落生態已大不相同，以往族人離開部落到外地旅遊，如今卻是來自世界各地的觀光客走入我們的家園。

他們對部落文化充滿好奇，喜愛購買織品、傳統服飾與食物，並積極參與織布、歌舞與體驗部落生活。來自不同文化背景的人們，使部落成為多元文化交流的平台，這在過去是難以想像的。

然而，在他們享受旅程的同時，我們也應思考如何讓他們理解並尊重我們的生活方式與文化價值。透過分享與教育，讓世界知道——我們是賽德克族！