朗聲四起

kari rudan cbiyaw “ balay bay u msblayaq balay ka kndusan ida sediq ” emca ana nanaq kingal bay dmux masu ka tkuyun ssiyaw bay rhngun sapah daw, ida musa mttuku bay uqun kingal kngkawas tnsapah da. manu ka pusu bay qpahun sediq sun asi tluung qmlahang ssiyaw bubu macu kddiyax, ini bay sdlihi hyaan ka rrngdi, asi ka saan lmlu kdiyax uri. kiya mi kmtuy macu ciida, mangal kingal bay dmux macu mi hpuyun dha ruma nribaw, embuwa ka qsiya macu ribaw daw, asi thngay kingal ribaw ka idaw macu da.

niqan kingal diyax, manu ka kingal sediq pnsrabang balay, wada na asi psai ruma tbracan kana ka kingal lubuy masu da, kiya mi umukun na umuk ka cbracan. embuwa ka qsiya macu cbracan ciida, rwahan na ka umuk cbracan daw, wada asi “ pic! pic! pic! ” enca mhnang kana ka dmux macu ruma cbracan da, wada mpuruc kana ka dhiya da!skaya ciida ka puruc wa hmiti rmngaw kari, “ yamu sediq sun, kndadax saya daw, asi ka mdrumuc namu nanaq qmpah kddiyax da wah! kika mkan namu dhnu! ” enca. kiya ka ana dhuq saya, ida kiya miyah mkan pnhuma sediq ka puruc!

Niqal kingal uri, nasi mkmkan hiyi camac ka sediq pa, splawa dha ka camac, manu ka camac u asi iyah criyu mhiyu brah sediq ka camac. mabal kingal bay ubal camac, psaun babaw hiya mi mukun kingal kiya, ini qbsiyaq daw rwahun dungan, manu ka ruma kiya u wada thngayan hiyi ccamac da.

Sow snkrawah balay ka waya cbiyaw, ini ta nanaq qlahang malu bay waya ta cbiyaw, kiya ka dsnaw ta nii da. mntna na hiya wa. niqan ka kingal sediq pnsrabang,splawa na ka camac,tduwa miya mhiyu rhngun sapah na mi mangal yayu asi ebin hiyi camac ka sediq pnsrabang, kiya mi wada msdara nganguc qduriq mi mquri lmiqu ka camac da.ciida hmiti rmngaw kari ka camac, “ yamu sediq pa, nasi namu mkmkan hiyi camac u, asi ka muda namu mangal ramus ppakaw hiyi musa tmcamac lmiqu! ” enca. kndadax hini, nasi sow mkmkan hiyi camac ka sediq daw, asi ka musa nanaq tmcamac lmiqu, kiya ka pniqan ka uqun hiyi camac da.

Sow nii ka ndaan sediq pnsrabang.

傳說中，只要細心照料門前的一株小米，便能以一粒小米煮成一鍋飯。但有位貪心的人一次倒入整袋小米，結果小米變成野麻雀飛走，還警告人們今後需辛勤工作才能獲得食物。

當時，若想吃野味，只需呼喚野獸並取毛施法即可獲得。然而，一名貪婪者傷害野獸，導致野獸流血逃入山林，並對人們說，往後要冒險入山才能獲得野味。

這些故事提醒人們，貪心會失去Gaya的恩賜，唯有珍惜與勤勞，才能享有豐盛生活。