朗聲四起

Tninun pnsltudan rdrudan ta, kiya enca knkla mi tmdahu dha qqridin ta ita Sediq. enca ka payi Bakan Nawi. alang Snuin “mqridin ta ita sediq ini kla tminun da u sqsiqa dha balay ka kiya, sluhay tminun ciida u psparu balay bubu dha, uxay wana pdaun kari rmngaw ka tminun nii, asi ka spoda kndrumuc, qmita tminun bubu mi dadan dha qqridin, psaan dha tunux ka euda tminun nii, asi ka psaun lnglungan.” nasi niqan qnuqu ka tninun dha daw ana ksngan bubu dha, uxay uri u sqada na cka dxran da.

Qmita knkla tninun laqi qqridin ka sediq alang, spruun dha bay qmita ka qridin mkla tminun, kika asi ta klaun balay, sprun bay laqi qqridin ka knkla tminun nii. alang ta ita Sediq, laqi qridin u niqan ka tninun dha lukus pala mi sow pndpilan lukus. niqan tninun dha tokan balay mi tokan rawa ka snaw uri. rakaw lukus u primax dha mbanah, mqalux, mbhuway mi rakaw mdamay(棕色). niqan bay knkla dha tminun ka rudan ta ita Sediq, klaun dha bay tminun mi ou bay ka rakaw tninun dha ka qqridin, tmdahu bay sediq alang. tminun ka mqridin ta ita sediq u mhuma naq kri mi qmnuqah, nuqah nii ka waray ttinun dha, sow ka rakaw elu tninun dha capang doriq, unsunguc mi miri nii wa, niqan pnsltudan waya dha, tminun pala haya mi ssais dha lukus, capang hilaw taqi mi lmlamu kabang ppanun.

Saya daw, ssalu dha lukus plkusun risaw mi wouwa cnduray duri da mi, ssais dha bunuh, sapic mi lubuy ppsaan qqiya, wa mrana mi mnriyung sow tdhriq ka tninun dha, wawa pqyaan qnabin baraw kana. ana sow kiya wa ini dha pdangi ka rakaw elu ttinun rudan ta.

賽德克族婦女代代相傳的紡織技藝，象徵美德與榮耀。學習紡織靠觀察長輩織布過程，暗自記下紡織的方法及程序不能口傳。

擅長紡織、編織技術是女性地位與是否能紋面的判斷標準。她們以自種苧麻編織帶有圖騰的布料，手工藝則為綠、白、黃、藍等顏色構成圖案製成服飾與飾品。

現今原住民設計師融合傳統與現代元素，創造出具原住民特色的服裝、帽子，拖鞋、包包及手工飾品等與配件，持續傳承賽德克族文化精神綿延不絕地傳遞下去。