I ’ayaw no falo^ polo’ a mihecaan, malalood ko Amilika^ ato Ripon, matahidang ko i niyaro’ay a kapah a tayra i Ripon a malahitay. I taterongan noya kalalood, ira ko cecay a kapah, matama^ no laco^ ko kawanan a kamay ningra, caay ka nga’ay a paisingen, orasaka keton hanto koya kawana a kamay.
Yo taloma’ sato ciira a tayra i niyaro’, ma’araw noya mamiholol niira i, miliyas i ciiraan; nawhali mapili’ to nika poton no kamay niira. Itiya sato, ke:sem sa ko faloco’ niira, nikawrira, caay ka toled ko faloco’ niira, sa’i :cel sa cingra a matayal. Ano ’arawen ko pifalod niira to sepal, ano eca^, o kasoy haw i, matiya o nitayalan no tosaay ko kamay a tamdaw, makelecke:lec. Matira ko fana’ ningra a matayal. Na mati:ra haw I faha:l sa ira ko cifaloco’ay a fafahiyan I ciirran. Malecad ko faloco’ nangra a tatosa^, saka raramod sato cangra.
Mafana’ kita to ’orip no maomahay, ano mararid ko ’orad haw i, ma’opic ko panay, malahol ko pinaloma’. Caay ka nga’ay ko kinaira no nilitodan, saka mangarod cangra to saka’orip. Itiya sato, marihateng ningra ko sowal no tao, “Adihay ko katayalan i Tay-pak.” saan; orasaka folod sato to fafahi^ ato wawa^ a tayra i Tay-pak. Tangasa^ sato i Taypak, o tosaay ko kamay hanimaan, o mafana’ay to sowal no kawaping hanimaan, caay pakakilim to nga’ayay a katayalan. Itiya haca^ a mararom ko faloco’ ningra, comekel i cikaw no lalan, mangalay a micofay a talaniyaro’. Itiya a tatokian yo mito’aya^ cingra i, meli^ sa i ka’ayaw nigra ko nifalahan a tipelopelo’ ato maramarad. Rihateng sa cangra, “Ano sapoden ko matiniay a pacakay i, ma^deng o sapicakay to kakaenen, o mama’orip ko wawa^ ako.” saan, orasaka cakay sato ciira to salingsya^, saromi’ami’ad sadadayadaya^ sato a matayal. O ’orad kini, o cidal kini caay ka saan. O ’orip ningra haw i, mato sowal noya matanengay a kalas no mita o Pangcah toya “o ’aresing ko cokap a malingad, o fo’is ko tamohong a taloma’.” sanay. Matira ko pisa’icel ningra a matayal. Ciromi’ad ciromi’ad to haw i, mato’as to ko wawa^ nangra, pakacakay to paliding ato loma’ Onini haw i, o heci^ no pisa’icel nangra a matayal ato caay ka talaw to masamaamaanay a roray ato pades.
