朗聲四起

Yawi’ ku’ ralu’ mu. kiya’ cku’ bih na’ gawng ku’ imu mu. yani cubalay kinakian na’ nanabakis ka’ aruwa’ cu’ cunga’. yani san na’ nanabakis maha’ capaang a’ tinqalangan cu’ cunga’.

kinbalay ni’ yutas mu ki’ qumisuwan niya’ na’ mamaliku ku’ imu. latanux ru’ suw na’ siyagsiyag nku’ imu ga, hinaga na’ babatunux kahabaag. bih na’ latanux ga kiya libu’ na’ waylung ru’ kiya qutux ku’ ibabawiq ka’ kahuniq na’ yabung. manahuqil ’i’ yaki’ ki’ yutas mu la ga, akih gi nabakis cuqaag ku’ imu ru’ ini baqi’ kakian ku’ imu ka’ hani la. lungulungun mu cubalay ku’ sipaglug kuwing makarakiyas ka’ kinakian mu ka’ imu. mangilis cu’ hyahay yo.

kiya qutux ku’ gawng ka’ humaynas cku’ suw nku’ tinqalangan. minukahul cku’ suw na’ ragragiyax nku’ tinqalangan. payux cubalay a’ qasinug ku’ gawng ka’ hani. kiya a’ qulih, kakuwas ru’ kakagang cku’ ik na’ qusiya’ ka’ hani. kiya a’ taka cku’ siyag na’ qusiya’. babaw nku’ qusiya’ ga, kiya manbahaag ku’ tatayu’ ru’ qalayngan. magbatunux cubalay ku’ tatayu’. rahuwal ku’ qaqahing niya’. payux ku’ manamananaq ka’ iru’ inha’ ga, magalawa, ma’uba’ ini ga matanah. ini ka’ingasug ru’ manbahaag i’ babaw na’ qusiya’, ini ka’ingasug ga manbahaag cku’ siyag na’ rawq na’ gawng. ini ka’ingasug ga manbahaag cku’ siyag na’ gawng ’i’ humihip cu’ pahpah. manbahaag ’i’ manbahaag laxi cubalay mawp cku’ kari’ na’ kawbay.

kiya cku’ bih na’ gawng ku’ capaang nku’ imu ni’ Yawi’. hawru na’ bayhu cu’ aruwa’ ka’ kaal. kuminabuwax cu’ pila’ ki kanayril ni’ yaba’ niya’ ’i’ Yawi’. babaw na’ qutux cu’ kaal ka’ aruwa’ la ga, naqarun niya’ kabalayun la ku’ giqas na’ imu niya’. maqas cubaly ’i’ Yawi’. kahi ’i’ tumuting cu’ imagal cu’ bawwak ’i’ Yawi. siqasug niya’ cku’ gluglug niya’. minrumag ’i’ tuma’imu ru’ kuru’nguun niya’’i’ Yukan ’i’ muwah ’i’ sumqaqas. siqasugun niya’ tikay cu’ hi’ na’ bawwak. mana’aring cu’ qaliyan ru’ gabiyan ’i’ manubuwag i’ imu ni’ Yawi’ ’i’ Yukan. kumaal cku’ wawwaw na’ itaal cu’ cunga’ naki miray cu’ kulu ’i’ musa’ i’ imu, laxi piray cu’ kulu san niya’ ru’ asi ’i’ qilap i’ imu ni’ Yawi’ ku’ mama’ niya’ la. ikuwing ga, payux ku’ wawwaw ru’ balaiq paganawan ku’ qutux cku’ ri’ax ka’ hani. maymag kuwing ini nababalaiq ’i’ maqilaap cku’ gabiyan ka’ hani. lungulungun mi cku’ kinaal ni’ mama’ Yukan cku’ wawwaw na’ itaal cu’ cungna’. asi cu pasiyaq ru’ sumapiyal cu la.