朗聲四起

tiku inuwahan nku’ Matu’uwal ga payux ku’ ini packa’ ka’ kinaal na’ itaal. gumlug cku’ luliyung nku’ Holong ru’ tayhuk cku’ raya’ nku’ luliyung na’ Mayri’ ka’ waw ka’ hani ku’ sinawawun nku’ kuruma’ ka’ nanabakis na’ Itaal nku’ Matu’uwal.

tayhuk cku’ raya’ na’ luliyung nku’ Holong la ga, yani san na’ Gipun maha’ luliyung na’ Mayri’. tumimu’ han i’ Mabawtuan ku’ kuruma’ ka’ itaal, babaw’ niya’ la ga, Mabawkian ru’ Tabilas la. yani ku’ kakian na’ itaal kahabaag nku’ Matu’uwal cu’ sawni la ku’ Mabawtuan, Mabawkian ru’ Tabilas. kiya cu’ buwinah na’ ralu’ nku’ Matu’uwal ga Mayrinax. siniralu’ nku’ kumaal cu’ kai’ na’ squliq ka’ minakiya i’ Babuan cu’ Para’ ka’ Kinahakul. Matu’uwal ga yani ku’ siniralu’ nanaq nku’ maki’ cku’ Tabilas. kumaal ’i’ Abisang maha’, maki runi ku’ Gipun na’ ga siniralu’ naha’ ku’ luliyung ka’ humaynas cku’ Tabilas maha’ luliyung na’ Mayri’.

Mabawtuan ga, yani a’ capaang na’ ralu’ cu’ cunga’ nku’ Mabawtuan. ralu’ na’ Tu’iya’ ga Matuan. tiku kakian naha’ ka’ hani ga, maghaghap cku’ raya’ nku’ luliyung na’ Tahu ru’ tigianan na’ raya’ nku’ luliyung na’ Sisuwei na’ tigiil. kiya ku’ ralu’ cu’ buwinah maha’ luliyung nku’ Mayhing. makiya ku’ Gipun na’ ga kahabaag ka’ tinqalangan na’ Itaal ga, kiya cku’ iglag ka’ ragragiyax na’ luliyung nku’ Mayhing ku’ qutuqutux ka’ tinqalangan na’ Itaal. papgiyayun na’ Gipun ku’ Itaal la ru’ sinraluan na’ Gipun maha’ Cingan la.

capaang na’ ralu’ nku’ Paquwali’ ga Mabawkian. ’i’ yani cku’ sinraluan nku’ Matu’uwal ku’ ralu’ ka’ hani. tumuwang la ku’ Siputu’ ru’ sinraluan niya’ maha’ Paquwali’. sinubilan na’ nanabakis nku’ Mabawkian ga, ibabawiq ru’ rahuwal ku’ kakahuniq. yani ku’ balaiq cubalay i’ kakian na’ quwali’ ru’ yani san naha’ maha’ balaiq i’ qubuwaan cu’ quwali’.

Tabilas ga, kiya qutux ka’ luliyung cku’ tinqalangan ru’ ralu’ niya’ ga luliyung na’ Tapicwo. asiga makasawbih cku’ ralu’ na’ tinqalangan. ralu’ na’ Itaal cu’ cunga’ ga Cagaw. muwah la ku’ Sebu’ na’ Tu’iya’ la ga sinraluan niya’ maha’ Bunsuy. kiya’ ku’ kai’ maha’ Bunsuy ga maymuwang na’ qusiya’ san na’ Tu’iya’ na’ Siputu’. Mabawtuan, Mabawkian ru’ Tabilas ka’ tinqalangan nku’ Matu’uwal. kumaal kahabaag cu’ kai’ nku’ Matu’uwal. siqunun kahabaag ku’ rawiq na’ Matu’uwal cku’ tinqalangan cu’ sawni ga, kii’ nanaq cu’ mamatuu’ cu’ kabhul. 

汶水人相信祖先是沿著後龍溪及其上游汶水溪，分別定居大坪部落、八卦部落，圓墩部落。汶水人有Mayrinax和 Matu’uwal兩種稱呼。

大坪部落，漢名是馬都安，原名Mabawtuan。散居大湖溪上游右岸和洗水溪。Mabawkian是八卦部落最早稱的名字，泰雅族人以此為捕獵老鷹的獵場。圓墩部落因打比厝溪諧音而得名，更早以前的名字為Cagaw，後以「混濁的水」及「汶水」為地名。目前汶水人總人口約600人。