朗聲四起

Cbeyo bale hayan we, “Fuarmosa” kesun daha niqun ta Taywan saya, ado tnugiyo sapo so dupi ma qqhuni qtaan ka dheran Taywan nii. Rudan ta cbeyo, msbleyaq meniq knmalu sapo dupi, qqhuni ma mrtaso ka yyayung duri. Uka qtaan ssunu ma rnecux moda mapa nniqan sapah alang ma pnhgalang seediq duri.

Alang ta ita Seediq ncbeyo, ga meniq qdgiyaq, qqhuni ka ssiyo sapah ciida. Kiya ma, egu klegan pnhyegan ka sapah; sapah snalu qhuni, sapah snalu btakan ma sapah snalu btunux duri. Eruc ppheyu sapah we lmlamu klegan, nngalan daha nanaq kssiyo nniqan kana.

Ita kesun Seediq nii we teru ta dndulan kari; Seediq Truku, Seediq Tgdaya ma Seediq Toda. Bale ba we, seediq meniq tgbaro hari, qhuni ssalu daha sapah nniqan, meniq llebu hari, btakan ka ssalu daha sapah nniqan. Duma we mangal qhuni ma bbtunux spuun daha smalu sapah, netun qmuyux de ini tslii qsiya quyux. Kiya, ani naq paru hido, ini kttilux ka sapah truma duri.

Ssiyo niiqan ta hini, niqan seediq Tayal ma seediq Bunun, ini hari pntena ka gaya ta uri, ani si msbleyaq ta bale. Seediq Tayal we wada egu hari mntena gaya ta, so gaya Ptasan, msterung, tminun pala, tminun rawa ma tmcamac lmiqu. Kiya ma, qmlahang Taywan ciida ka Tanah Tunux, gnmaxan ta na psuupu seediq Tayal han. Bobo na de, ye ado egu ini pntena ka kari ta. Kiya mbeyax mosa mangal ngayan ta naq ka ita Seediq Bale, qulung wada ta ngalaun ngayan ta ita “Seediq Bale” ka knkawas 2008 idas 4 ali 23 di.

Ita Seediq nii we, tnhrigan ta Tanah Tunux ma, ga ta meniq alang bgurah ka saya di, ini so ncbeyo ka kndusan saya duri di. Ado niqan sapah ppyasan ka saya, wada mtgimax msuupu kana gnkela na rdrudan ta cbeyo di. Ani nanaq so kiya, ida ta msdangi ma msbleyaq ba ka tnsapah ma klaalang de malu di.

賽德克族人的部落都居住在山上，家屋型式呈現多樣化，建材取自四周環境。賽德克族有三個語群，Truku群、Tgdaya群、Toda群。居住高山區以木造建屋，較低區以竹造為主；有的以石材和木質混合造屋，主要的功能是排水良好、冬暖夏涼。

我們與泰雅族和布農族相鄰。有著相同的生活模式和各自的獵場。過去賽德克族在日本時代是被歸屬於泰雅族。族人努力正名之下，在2008年4月23日正名為『賽德克族』。