朗聲四起

ka tevutanga dingki maljiananga a tja sipa’ulja’ulja, sa maumaljanga a tja sikudan a tja sikavaljut auta. ljakua aicua sikudanan nua semicuayan, nu neka sapuy maru neka zaljum a tja sikavaljut sarekuya aravac. manasika a tja sikarakudan a semicuayan, a sipazangalan tua sapuy, namaya tua sipazangalan tua zaljum. ayata aicu a sapuy nuaya, a pitua tja kakudakudan namasan paravacangata. nu pecunguitjen sa medjek makayanga lemikezalj kemesa tua kanen, nu kaljaljalje’elan mavan a sapuy a tja sikingidu a malingulingulj tu sikaseljec.

azua na mazazangiljan a kasasavan tja kaka’epuan i ’inaljan, nu izua pupalisian pucekecekelj, nu’ezemezemetj pinivecekadan a sapuy, sa tja ziazian a malevaleva. malap ta namalaicanga ljaviya ungeljen sa seman zaman, sipa’ulja ta djalan nu ’ezemezemetj. nu izua pacugan i ’inaljan, pucevulj sa pakeljang tu yanuan. kumalji a salilim ulja djaljuni a pase’eljing a kirimu. mayatucu ti vuvu, nu makakiva’u i cengceng a liav a ’iav a gang a makaveljeluan, tazua masizaman tu sipa’ulja marepusalasaladj, a tjemiljual ta gang ta ’iav sa sipangapangalj, izuanga tja kanen tja sinikalevaanga a mapuljat. nu cemulju ta ’acang, malap ta zaman sa papedjeki tu semingis a pakasangas, kata nu cemapa ta vasa a seman aradj. nu masusalimananga a u’alja’aljay mavana sapuy a sikasengeseng tua ljemengua’ ta turivecan a tjakit a vulu’, a sipana’ a tiveljatan vakela, a si’usu’usul a kakara(kakarang), a vuka, katua seman djilung, sapuy sakamaya sikasengeseng. rema’azemetj a masizaman, lemivu tua tidriyulj, cemevulj tua pakazuazuanan a lala, na lava, cia, but, nu macevulj sa kaviladj madjame’ sakamaya. a tja uma’ kasicuayan nakuya ika tja padjekedjekecan a ’avuavuan a pucevulj, avan nu ’emuveling aya ramaljemaljeng. ulja paljakev tua ’eluz tua sialangan, ika kicaingan na ’atjuvitjuvi kata sasayalj tu maljekuya tja uma’ . aicua pita kemapalisi nu masalut nu maljeve’, izua sakamaya cemevulj, padjekec tua singilj a djemaulj tua cemas a kivada’ tua cemas.

kemasi tua sapuy setje keljanganga tu namakuda pinakazuanan a ca’uan nua tja sevalitan. nu namayatucuanga itjen a izuanga ta dingki na sekiamav tua situcuananga a sikudan, a nekanga tja valisaked tua tja sikavaljut, nakuya ikatjen a kipa’enetj, tua tja sini kavaljut a sapuy!

傳統的山居生活，沒有火非常不便。生火就可煮食、冷天可以取暖，夜晚也能圍著營火跳舞、歌唱、也能燃起烽煙傳達訊息。族人結伴帶著火把，殺豬時用火把燒烤豬毛或烤芋頭乾。部落男子會用火把整理獵具或燒製陶器，也會用煙燻將洞穴中的飛鼠、松鼠，逼出洞外然後獵捕。以前屋內爐灶要點火驅霉味、舉行拜祭也需要引火，燒墾田地也需要火。

老一輩的生活技能是不能忘記，我們應學習來讓火的文化，以期保存流傳。