朗聲四起

“pipi! pipi! kuahau! kuahau!” ayaya matu kulangedangedan a kemasi kasasavan, pakirimua’en a ljeteku sa ’u kemasi ’ezung a paljilji, u! iya! kukeljangen tu ti kama i yubing, pakirimuaken a djemaulj tjai vuvu a malap ta hang , ulja makaya temalevak tua kuahau. tazua sekauljana’en tu malap ta ’ecap(kacian), sa pasigaljuin ni vuvu a cemelak, manu sinipasusu’ ni kama i maicus a kemasi taipei a siasing nimadju. matu nema a levan ni vuvu tazua, ’au kiseljang a’en a maleva auta!

aicu a ti kama i yubing, namatjak a tjalupun a sinitung, a tinivavavan a ’utubay. aza ’utubay i tjai ’ayav i tjailikuz izua sinanelubuk, papangaljan tua mareka tigami katua cinavuan. penaljipaljing a sematjez tua tigamianga, nakipapaulingav napasusu aravac tua sengesengan nimadju. saka inika puzalangezang puljalje’el, inika pu’emudjalj puvenali, kamayan sakamaya kidjelian tjanuitjen a sematjesatjez tua tigamianga. aicua namaitucu a namakaki’adilj a sikudan, a namitatekuan, napena’aljay aravac, mavanu tja kakicualan a pa’ulid.

maitucu aza tjaucikel nivuvu, kapasusangas tu unem apulu’ a caviljan, a tja ’inaljan kasicuayan, nekanan a pacacikecikel tua ta langedangedan a kemasi tju’alja a patjara nemanga , namatjatju ’inaljanaljan itjen, nu izua pacugan, ikatjen a selangeda ikatjen a seljavak, nekanan a ljingas(dinva), uangka, nasemarukuya aravac a tjasikarakudan! amin a yubing a navenaca’ tua tja kinipaparangezan tjaimadju!ayata azua siparecacikelan nua ’inaljan katua i tju’alja, azua i sasasasav a semupusupu a ma’acuvucuvung a tja sikatja’aljan, mavana tigami a kini paparangezan tua sikeljakeljang tua sipacunan, tu namakuda kata kemudakuda i ’inaljan katu i tju’alja.

pusaladj a manetigami tua tiamadju a inika kemeljang ta ljinautiyan a vecik, sa izua nu pusaladj a semupu tua tigami a nakemasi tju’alja a tjasikata’aljan a sivitjay, izua nu seljavakitjen a ki’aivuavuan ta vuluvulung, lemalimaliman sa ’ivuivu, ayata pairang tiamadju, ikamaca’u tua tja kai, pazangal a mare’aivu. ’au timun a kakedrian tjara pazangal a masalu taicu a namaitucu a tja parekiljivaljivak a pa’ulid, lja ikamun a naseljavak a tjaivilivililj! saka nu djaljunenitjen niamadju a yubing a sematjez tua tigami, maljimalji tjayavav sa pudjavadjavayi a papupicul tua tja yubing!