朗聲四起

Maolah ko ’adingo to cidal ato folad, matiya o mo-su-se ko ’adingo, honihoni tala’a’ayaw, honihoni talararikor ako. Mipakpak kako to kamay i, mipakpak ciira; mi’awas kako i, mi’awas ciira. Nika o kalahokan to i, malahedaw awaay to ma’araw ciira, matiya o tatirengan ako, ano mimaamaan kako i, mitodong ciira a mimaamaan. Ano talacowacowa kako i, tayra ciira a mido^do^. Ano awaawaay ko ’orip niira i pakayni i takowanan ko sakatadamaan ningra.

O malalokay a maomah a tamdaw i, paka’araw cingra to ’adingo no tatirengan nira; nika ya i lidongay a tamdaw i, caay paka’araw cingra to ’adingo no tatirengan ningra. O sakasan haw i, “Awaay ko paherekan no tamdaw a minanam”, matiya o malalifetay to ’adingo no tireng ko ’orip no tamdaw, caay ko mamato:or cingra, nika caay piliyas cingra to tatirengan ita a patihi. O faloco’ ita ko pi’arawan. Nanay lacecayen ita ko tireng ato ’adingo ita a macodah, moecel, malalok, lipahak, masinanot ko faloco’, onini haw i, mato pinangan no ’adingo ko ’orip no mita. Aka ka toka! Ano matoka kita i, mato pakangodoay kita to ’adingo no mita.

Makilok no ’adingo ko ’orip no mita, nani mamang yo sawarawara sa ko rakat ita, tangasa i kalakapah ita, ta tangasa i karokoyan ita a matakonol ko tatirengan. Mado^do^ ningra ko polong no pinangan no ’orip ita, ano hatirati:ra ko ’orip ita i, ca:ay piliyas cingra i titaanan, nika mata’elifay a ’orip i, caay to pinokas patatiko. O ’orip ita o tamdaw itini i hekal, hacowaay ka karaya’, pinaay a sa’osien ko romi’ad no mita itini, away ko mafana’ay. O maan ko kacifaloco’an iso a demak, o maan ko malaheciay to iso, o maan ko caayay ho kalaheci iso a demak. O ceca:ceay no romi’ad i, o kakalimelaan a maemin, caay kanga’ay a mila’om kita.

Orasaka, sa’icelen ita, ’imeren ita ko ’orip to rom’ami’ad, ano matira i, ya nisa’icelan ita ato milahecian ita a tayal ko malo kakahemekan ato kaka’irayan no tamdaw a mitapal.

影子喜歡太陽，也喜歡月亮，像魔法師，一會兒在前，一會兒在後。我拍手，它也拍手；我踢腿，它也踢腿，像分身，總跟着我。人生如與影子賽跑，只要勇敢努力、積極向上，影子便隨行不離，永遠追不上它，但隨時在旁。影子就好像是我們自己的縮影，影子記錄著我們的成長，從孩提的身影、年少英挺的身軀，再到老年彎著腰的背影，把握好人生的每個階段，才能留下自豪的身影。