朗聲四起

kasicuayan izua za maresudju a madrusa, ti sa kuljeljeljelje, kati sa muakakai. aza kina nisa muakakai inikana tjenglai tjai sa kuljeljeljelje, ayatua izuanga vinarungan a zuma nimadju, pai kinemnem aza kina ni muakakai tuki kudayin a pavavaday tjiamadju a madrusa. izua ka makatalj, ma’epu’epu a mapuljat a vavayavayan a uri padjulu a seman kakanen tua u’alja’aljai. tazua ranaven a semkaulj aza ti sa muakaikai na kina a sematjatjan a tjezaljum, kudayin aya timadju sa ki’adjilj a vaik a sematjatjan a tjezaljum.

inikacuay masasuitaita a mangetjez a na’emaljup a u’alja’aljai, aza tjakaljavaljava a vavayavayan i ’inaljan, pakirimu a malap tua kinasengeseng a cinavu sa patjavangan tua u’alja’aljai a semululjayan. au tisa muakakai na masilevan a uri pakaleva tjaisa kuljelje ta cinavu nimadju. manu tazua ka pavavala keman tisa kuljeljeljelje, maumalj i sauniuni aza mudjingan ni madju… manu ’uvalj na’acang aza sinipaluvluv! aicu tjara pasaliv aya kinemenem tisa muakakai ka pacun tua mudjingan nisa kuljeljeljelje, tjara pinavalitan nikina aza paluveluv aya tisa muakakai.

aki ken na kemuda nu maytucu aya tisa muakakai, sa paljelalaing a pacun tua kinatjengelayan a sudju nimadju a namasi suraman a vaivaik… kacuayanga pakirimu a lemaying tisa muakakai tjai sa kuljeljeljelje, sa ’emau’aung a ki’aung tjai sa kuljeljeljelje,” mayavaik ari cikeli a semauma!” ayain! ljakua mayatucu a ’ivu tisa kuljeljeljelje,” kudayin a ika selaying a su matjaljaljak tjanuitjen, sau cikulu a semauma’!” aya tisa kuljeljeljelje!