朗聲四起

’aring ’ima ’ol’olae’an ya:o hayza’ ka kinSiwa’an ray hinaz’azem. ya:o minowa’ rima’ ray latar komita’ ka ’ima his’alan kawaS ki ’ima bolalasan ka homom, rima’ manmara:an kil kapa’onhaelan ray pinatiyayan somoloeh ka ’ayam a ’aewpir. hini noka ’ima haeba:an korkoring kin minowa’ ka howaw. powa’aw! ma’ ma’an kin Sarara’an nanaw.

ya:o ’am Somowaw ka kinSiwa’an ma’an, mayhael ya:o ’am rima’ ray ’ima ’okik hingha’ ka ’oem’oemaeh manmanra:an, komita’ ka ’ima ’okik hingha’ ka kin’i’iyaehan ki kaspengan.

ya:o makakreng ila ’am kiSka:at, ’ana ray minaSangay ma’ ’okay honasamez , rima’ tatoroe’ noka ’amilika’ kapayaka:i’ ki ka’alnoripon, ya:o paka:i’ So: ’akoey ka kiniSka:at ma’ ’am Sekla’ ’akoey ka kinra:aman, ’aehae’ ’aehae’ hahila: Sahpi:ih ila, ma’an kin’i’iyaeh hebengen ila noka kina:at, ’oka’ ila Sapang nonak ka kin’i’iyaeh, ’ana nak’isaza ma’an ma’ hayza’ ila ka kin Sarara’an ray hinaz’azem ’i:zo’.

yako Sarara’ ’ima haeba:an ka kapa’onhaelan, nasiya Sinarak kin hil’awan, minaSangay rima’ manmanra:an komita’ ka ’inalingo’, ’a’iyalatar rarakrakrak mam sawa’. ya:o ma’az’azem ma’an Sinarak ’ampowa’ kin Sil’i:? ya:o ’am Somowaw ka kano’? ’ampowa’ kin hopay ka hin’az’azem? kinSiwa’an ki Sapang kin’i’iyaeh sa’owaz ’okik hingha’ a tomal.

自小喜歡戶外活動，欣賞藍天白雲，和朋友到田間烤肉、烤番薯，是許多孩子夢想。我夢想是遊歷各地，體驗不同的文化。為實現夢想，勤奮讀書，假日也努力學習不同語言，生活幾乎投入在書本中。看到同學們輕鬆遊玩、歡笑聊天，我不禁懷疑：為何我這麼疲憊？夢想與現實真的衝突嗎？某天發呆時，老師叫醒我、開導我：讀書是對的，但要懂得安排生活，與人互動、幫忙家務，才能減輕壓力。追夢不能盲目，應選擇適合的方式，才不會迷失方向。