朗聲四起

’aring ’ima ’ol’olae’an ya:o hayza’ ka kinSiwa’an ray hina’azem. ya:o minowa’ rima’ ray latar komita’ ka ’ima hes’ezan kawaS ki ’ima bolalasan ka homom, rima’ manmara:an kil kapa’onhaelan rima’ ray pinatiyayan somoloeh ka ’ayam a ’aewpir. hini kin haeba:an korkoring minowa’ ka ’inakhini’an howaw. powa’aw! ma’ ma’an kinSarara’an nanaw.

ya:o ’am Somowaw ka kinSiwa’an ma’an, mayhael ya:o ’am rima’ ray ’ima ’okik hingha’ ka ’oem’oemaeh manmanra:an, komita’ ka ’ima ’okik hingha’ ka kin’i’iyaehan ki kaspengan.

ya:o makakreng ’am kiSka:at, ’ana ray minaSangay ma’ ’okay honasamez ’am kiSka:at, rima’ tatoroe’ noka ’amilika’ kapayaka:i’ ki ka’alnoripon, ya:o paka:i’ So: ’akoey ka kiniSka:at ma’ ’am Sekla’ ’akoey ka kinra:aman, ’aehae’ ’aehae’ hahila: Sahpi:ih ila, ma’an kin’i’iyaeh hebengen ila noka kina:at, ’ana nak’isaza ma’an ma’ hayza’ ila ka kinSarara’an ka hina’azem.

yako Sarara’ ’ima haeba:an ka kapa’onhaelan, nasiya Sinarak kin hil’awan, minaSangay rima’ manmanra:an, komita’ ka ’inalingo’, ’a’iyalatar rakrakrak mam Siyae’. ya:o ma’az’azem ma’an Sinarak ’ampowa’ kin Sil’i:? ya:o ’am Somowaw ka kano’? ’ampowa’ kin hopay ka hin’az’azem? kinSiwa’an ki Sapang kin’i’iyaeh sa’owaz ’okik hingha’ a tomal.

ya:o ’ima hihimi’an mam ma’az’azem, ’okik ra:ami ray hikor bazae’en kamatortoroe’ ’omoe’oe: ka raro:o’ ma’an Sa’, “’away! So’o ’ampowa’ ngangorayan kita’en?” kamatortoroe’ ra:am ma’an ka hin’az’azem, siya mayaka:i’ ’iyakin Sa’, makakreng kiSka:at ma’ kayzaeh! pakra:am ’a’apel ka hahila: Sobaeh nonak ka kin’i’iyaehan, ’izi’ pawhi:il nanaw ka kina:at, ra:am kiSka:at ma’ pakra:am Siyae’ ’oyaeh. So: ’am kiSka:at pakhil’awan ka hin’az’azem, So: honasamez ’amkay kiSka:at ma’ Sa’ila’ Sowaw ’in nonak a kinhinowa’an, ’oka’ ma’ ray taew’an tatilhaehael ka kapatawawen. nakhini kayzaeh ’okik Sil’i: ka hin’az’azem, ray ta’oeloeh ma’ ’am rompa: ’akoey ka kinSekla’an. Somowaw ka kinSiwa’an pakhayza’ noka nonak kapanra:anan, ’izi’ i nak ’ima lo’aw’aw Siri’, nakhiza mina ’am ’omaS’aSay ka ’in nonak a wa’is.”

自小我喜歡到戶外看那藍天和白雲，到處走走，和同伴們到田間裡烤肉烤番薯，這是許多孩子們夢想的事情。

我要追求我的夢想，未來我要到不同的風土遊覽，體會不一樣的生活和風俗習慣。

我認真地讀書，即使在休假時也不停止的求知求學，去學習美國日本的語言，我的生活起居，完全被埋在書堆裡，我終於有了夢想。我羨慕很多的同學，他們總是踩著輕鬆的步履，休假時到處溜噠，看電影，聚聊而相互調笑著。我在想，我的步伐為何如此沉重？我在追求什麼？為何有疲累的感覺？莫非夢想和現實生活是完全兩個世界。

老師知道我的想法，她告訴我說，認真讀書是對的！但要懂得如何分配自己的生活，不要死讀書，會讀書也要懂得與人相互交流，求學就要放開所思，也可在家幫忙家務，這樣就不會有沉重的思緒，追求夢想要有自己選擇的途徑，別像迷途羔羊，徒然浪費自己的力氣了。