朗聲四起

Masuni tu kira nicaitan i cavengay a tuki i enemay nu kalaviian, Yah! pisicera’! a u maan hani ku sakalavi. Tueman tu ku remiad, araw ciwi satu a tayra i yiese. Pasatuku han ku otovay i lilis nu lalan, mikilim tu kangalayan a kakaenan.

I lalavu nu yiese, u nitengeran tu simal a ayam ku nikaen nu micudaday. Malehululay a kapah makakitin tu a kemaen tu ni'id’idan nisulesulan a titi. U ruma a lavang tireng sa a kemaen tu situngalay tu tinayi' nu vavuy a tuwami, iraan u mikuliyay masaliyut i sapad a patawsi kemaen tu nitucekan niciyanan a sinavel. sisacacay sananay a matuasay, pasinavel tu nipatawyiw a vasis atu kavi nu tamkuy. Nika, sacinglaw cacelcel sa ku tamdaw, maserep tu aca ku sakakemaen a valucu’, kaitila tu i ngataay nu luma’ a pacakayay a malavi ku ngaayay.

Caluway ku aniniay a wawa atu matuasay, anu caay kangalay a micacak, anu mangalay hen a pacena' tu kaen, pakatelay han kira micacakay, pataduen tu nu tawu a micacak tu kangayayen a kakaenan. mahaen tu kiyami ku urip nu aniniay a tamdaw.

Kanahatu caay kaw maamaan ku i tahkaay. Nika, nu sakaurip a kaen nu luma’ kiyami, sicamul aca tu tawa, tu kungku, tu nikaluwaluwah nu alumanay, masarumud ku valucu’ nu luma’, tanektek aca ku vecul. A maanen a miditek ku nikasa’ula’ulah nu masaluma’ay.

U kakataluma’an tu! Paengaw saan a pasakudul a mimelaw, tangelal saan kira masakaliti’ay i kakarayan a vulad. Nasahen ma’urun tuaca kaku tu ayaway a kaen nu luma’, kasicah caay ka u maan ku nicacakan a sinavel. Nika u nisakilemelan nu tamdaw nu luma’ a micacak, a ki’alesu’an aca haw nu palutingay ku kaen nu mita? mangalay tuaca kaku a mipalita tuya tataluma’ay i lalan a tamdawan, “makareheten hen haw kamu, u lisin nu sarahevaran kina lavii kiyami”!

牆上鐘聲敲響六點，下班後我煩惱晚餐。天色漸暗，不知不覺騎車來到熱鬧的夜市。把機車停在路旁，夜市人潮熱鬧，食物豐盛，但因人聲吵雜，卻讓我失去食慾，轉而回到家附近找間安靜的小店。現代生活便利，外食應有盡有，若不想在家做飯，即可打電話訂餐，生活上方便許多。夜深了，我抬頭望月，忽想起家鄉的家常菜，那份簡單卻蘊含人情味的滋味令人思念。不禁想問，回家路上的你們，是否還記得今晚是中秋？