朗聲四起

yau ta kalingku pateRungan leppaw ni bai, qawaRi qalalazing ta kinilan na lazan, ta tuRuz na yau naung, simpatengayaw tu lazing, mai tu dasam bangsis bali na, mai tu temuRes ay qitun, yauqaya maRung ay qazqaz na lazing zinu buqan, mezukat sezang nizi ta lazingan simqena taytan, wanayka, mai qakalingun mai ku ngid tanan ay ussa wanma zau, yau pama ussiq sataytan, ’nnay nani sammayan ni bai. ta suRena ay qabtuan ni bai, pataz yau nisepez na tu usisiq lubus, sapepeRasku Ribang, taytan ku Raynguan ku niana ’nay, Raqana maytis iku pisapat temingiw mimet, ta melanayan yau niseppawan mai iku tumayta ta qatian melubas ay tened, umipil iku tu nianiana ’nay, wanayka, muwaza dames, temanan iku taytan ku muman mipil qakelisa. tangi yau lazat sanu ka tu niana ’nay, sanuan ku tu maqezi ta qatian ay tened, babuy na naung, temuzus tu humung, qabus na lazing, qaiR seRay naququni ay tamun na lazing. Raqana matiw ti iku sa sammayan qeman, melana ti iku antangi pazukat pa tu niana paqan ti tina! yauzuma Rabetin ta qatian sumRuz ay tened paRamesan ni tina meRamaz tu salang, nipumiyan ma mai tu nianiana Rames na, padames nengi ti qanan.

ta izipan ku pasi yau Rinang na yencumin, Raqana semingut ti iku tu maqelazing ay tamun, ta qatian melubas ay tened, Raynguan ku ti utatani ti kaysing niqan ku tu ’may. semanu ti tu ’may ni bai, ta sammayan tatezuma ay, Raynguan ta tu niana beRas ay uu tatezuma ay siuy na sammay uu zuman nisammay na, ta sammayan ni bai nisammay na tu ’may, qenabangsis na puniR ta ngibiRan, ta unungan, limezan ta, tenes temineng ta ngibiRan qenabangsis na, maken mai tu tamun, wanma ’may qanan ta, qawqawman nengi qanan qaya, zau pasi ta tukayan satatabu ay beRas mai tu nazau qanengi ay yu! semanu tama ku qaya, ta naungan na pateRungan yau ussiq tengilaw tuRpus ay beRuR na zanum senatenguan, qenian mai umeted zanum na senatenguan, sadaiyungan na damu sananuman, sakuwayan tu zenna nizu maqezi tayan mala tu zanum, semanu ti tama qaya, tayan ay zanum mai nipasabiqbiqan meRamaz qanengi qatuRiyasan menanum, yauqaya maRames tu maqelazing ay bali, Raqana pasinanganan na tu beRas na alal, Raqana padames bangsis beRas na.

外婆住花蓮新社的濱海公路邊，背山面海，有海岸線與日出的美景，讓我難忘的是外婆家的廚房。冰箱放著各種海產、海菜，地上一堆沒看過的野菜，每次吃飯，很期待會端什麼出來？野菜十種一起煮湯，只加鹽，卻是人間美味。

外婆家煮的飯是特別的香，吃進嘴裡，即使吞下，香味仍久久不散，光吃飯就很過癮。舅舅說部落的後山有個很清澈又冰的水源，長年不乾，自來水、灌溉稻田的水，都從那裡來的，再加上海風，叫做小島友米，所以特別的香。