朗聲四起

masang yau paqenanem temiyam ay lazat ti angaw nangan na, nengi anem na, nengi tu lazat qaya, melizaq manmu tu ’daq, melizaq sikaput tu mazemun qaya. yau ussiq tasaw qangid ti paskua, azu tu pitasaw aizipna, qadadamu matiw semuRut tu tengi na ’daq, melaziw aizipna ta ussiq damu, ta lazanan matazay aizipna tu paqenanem sining yau ta libeng na paRin muRing, azu taRaw anem na qazuzuan niuRing na ngid qeteR ta paRinan. pazakian na ni angaw pemupuk, ipilan na sining ’nay, yau niana lanas na manna muRing tazian, nazau a lazas ku zin na sining semanu ti angawan, Raqana qangi ma ku mepatay zin na, suppaRan na ti ni angaw mesusupa leppaw na sining zau mai tu kelisiw sapaskuan, mai ti ngid qabinnus, qawka nazau ngid ti qeteR ya kenasianem na anem na, mezuzus ti angaw tu sining ’nay, bulan na ti tu kiyakiya kelisiw. ala na ti na sining kelisiw, susubatan na sining ya ti angaw.

wanayka Raynguan ni angaw, matayta na sining muwaza kelisiw ta izipan ni angaw, mengRaRiw ti anem na sining zau. Raynguan ni angaw mala tu bettu ya sining ’nay, tuktukan na tu bettu uRu ni angaw, meRaynang ti, mesuzep ti qaya, pasi mepatay ti zin na sining ’nay, melalazuk nizan na ti mala kelisiw ni angaw, wiya ti meRaRiw. tuRuz na, niiRaw na sining tu kelisiw alan na temiyam, temiyam tu ussiq zana ay tiyam, nazau simunang tu unem tasawan ya qenabinnus na sining ’nay, yau ussiq deddan, yau paqenanem semaqsaqay ay lazat, seddawan ti ta lazanan, temuqaz tu tiyam na sining ngid pabula tu zanum, sining zau mai mazin na temuqaz pabula tu zanum ay lazat zau, aizipna nani ta ngayau na unem tasawan ni tuktukan na tu bettu meluzit ti ay lazat, pasi mepatay ti ti angaw zin na anem na, mai mazin ni angaw ya sining zau qaya, pameng ma kasianem tu azu yau tanian tumayta tu tawki na tiyam zau. ta lazanan na semaqsaqay kasianeman na ti ni angaw tawki na tiyam zau, ta ngayaw na unem tasawan sining zau dadadas ay anem na, situqaw aizipna baluduq pasa deddean, sikawma mai tu mata ya deddan zin na, taRaw ti anem na temanan. timangu mai qenideddanan, mipil ti tawki na tiyam ’nay tibuqan na zengzeng mepatay ti.

從前有位叫Ayaw的生意人，他心地善良，樂於助人。他跟往年一樣，到各個部落去收帳，在經過某部落的路上時，遇到一位在樹下哭泣的年輕人。當Ayaw知道這位年輕人是因為家中窮苦，便給了年輕人一些錢。沒想到年輕人見到Ayaw身上有很多錢，起了貪念。他拿起石頭砸向Ayaw的頭部。以為Ayaw已死，就劫走Ayaw身上全部的錢逃走。

之後， 當Ayaw跟往年去收帳時，想起那忘恩負義的年輕人，才又埋怨老天無眼。然而，過了不久，就聽到年輕人被雷劈死的消息。