朗聲四起

111 年全國語文競賽臺灣原住民族語言朗讀文章 【噶嗎蘭語】 國中學生組 編號 3 號
temuqaz tu naung

ta hibangan qalizaqan niaq saleppawan ay nani temuqaz tu naung, mai tu hibangan mai tu lawad ti tama, setangi menunu hibangan deddan, pawRat hibangn ti tama ngid tuqaz tu pitasaw nituqazan niaq ibabaw ay naung na yangminsan cisinsan, yangminsan nani sasaqayan na ta taypakan ay lazat nengi ay sataytaytan semaqsaqay, temuqaz aimi saleppawan qaqelisa nani melizaq ti Raingu ti lapusan.

nisanuan ni tama tu tuqazan tu naung mai ma nengi deddan, wanayka qawqawman mai basaw anem niaq ngid tuqaz tu cisinsan naung, aimi saleppawan kinsepat nantungus imi qemaway tu qalizaqan niaq ay qaqanan zanum qapa, situnun pama ti tina, zau nani aimi saleppawan temuqaz tu naung qawman mewazing tu saazasan niaq ay Raibang, tina ku situnun, nayau pitasaw pitemawaR sasenipung naung na yangminsan, pataz lamenumenu melanay na, senulal sukaw saqayan lazan na, semaqay tu kikiya tumqez imi temayta tu taqatian sumRuz ay, tepuwaq ay simau uu qeluqut, pulaw, penay, adam, pelinglingaw, biyat, naququniay tulis na, semaqay tu kikiya tumqez imi maRaw tu libeng na naung, tatezuma simqenna taytan leppaw, nipaluman tu nianiana, saRumzang imi temuqaz tu naung, wanayka azu inengat ti izip niaq, azu masulun tu Rumzang mawalin ti dasam na izip. ta lazanan qalalazan temunuR ti tina tu satawaRan semaqay, timangu ti tina mesuRaw ay.maseq tu tekituk na naungn nengi ti deddan, maRaw ita pasamedaud zin maqayta ta libeng na naung simqena nianiana, yau qaya kiya lanem siyupan na bali masulun tu bali ta batadan na naung melaziw ta ngayawan niaq, maken kitut aita lazat, ta aimi saleppawan temuqaz tu ibabaw ay tekituk na cisinsan maseka tu meqeseR na waway niaq, mai imi sanguyan temuqaz tu tekituk na naung, ta tekituk na naung qeman, maRaw temaytayta, qalizaqan na anem, ipilan ku semanu ti tama ti tina, “ mai ti qenapilay na kelawkaway, qalizaqan na anem ”.

temuqaz tu naung niana ’nay mai tu niana, semaRuR tu naung mai pisapatan, semaRuR tu naung siqatatani mesusuRaw ti tina, tuRuzna kawitan na ti ni tama semaRuR, seRay ti tama matebes na ni tina mesuRaw, Raya luzit na, maseq ta libeng na naung, mezukat sikawma ni tina, muman si qawtu pa temuqaz tu naung zau muman.

111 年全國語文競賽臺灣原住民族語言朗讀文章 【噶嗎蘭語】 國中學生組 編號 3 號
爬山

家人最喜歡爬山,每年都會爬七星山。決定爬山那天,天氣不好,卻不影響我們爬山心情,各自揹著乾糧、水、雨衣。媽媽還拿著拐杖,一路上的風景有不同的美,雖滿身大汗,卻感覺身體減輕不少。

爬到最高峰時,天氣好轉,遠望可看到山下風景。在山頂上野餐、登高望遠看風景,感覺大快人心。下山路滑,媽媽一路上跌了又跌,由爸爸牽著下山,連爸爸拉著也跌,跌得滿嚴重,最後還冒出一句話,下次再來爬這座山。

 

文章資訊
文章年度
111
文章編號
3
文章組別
國中
文章語別
噶嗎蘭語
族語標題
temuqaz tu naung
漢語標題
爬山
文章作者
江素珍
漢語摘要