朗聲四起

setangi deddan, qaqelizaqan ku ay deddan, qatiw pa iku qalabu tu zana meniz ta lawlawan ta ay simsuqasan tu sikawman na kebalan, taRbabi semuRap, inaRan na ti iku na bai ku, ngid pama iku qaynep, wanayka siRab qaRabi sanuan ku ti bai ku tu inaRan timaikuan, tangi azu mai pama iku ngid qasuwat, wanayka, mai iku melazuk masuwat mai ti iku zazam tu qatiwan sa simsuqasan tu sikawman, tenes ti iku melana tu simsuqasan zau, malemes iku sinanam, ussiq ma anem ku, matiw simsuqas pazuqat tu nangan na kebalan, mala uu mai mala quni zin na anem ku, melalazuk ti iku masuwat, mewazing tu Raibang ku, mezukat ti iku melana tu patudan.

ta qalisimpuan pasa simsuqasan taqsian, semanu patudan mai mala quni, naRin muwaza nikasianeman, maseq imi ta zaqisn tu qitun, mazemun ti lazat, ta qitunan yau lazat satezay, yau lazat sikawma metawtawa, kikiyama, maseq ti imi ta qaizuanan na simsuqasan taqsian, azasan na imi paazasan ta qaizuanan niaq hibang, ta tati na taqsian mazemun ti lazat, niz ti siqudus tu tungus qudus na qaniyau, melana tu simsuqasan, yau alazat mai hibang yau pama padames muman sinanam, mai ti tu nianiana ta uRuan ku, qalinguan ku ti niana saliyaman ku, qasiR ti nidutiq na anem ku, qumRas ti tu nangan ku, temuqaz iku miRi ta babaw ta qaizuanan na simsuqas sikawma, nizu pasazi tamaikuan mata na patudan seRay melabu simsuqas ay temayta, padames ti nidutiq na anem ku, wanayka, quni kidadan na zin ku kasianem mai ti iku bilbil qaRayan ku ti meliyam, liwaliw nengi niliyam ku, temuzus tu tuRuz na mulpun meliyan, sumniz iku nizi ta babaw piqpiqan na iku na kaput ku tu lima, nengi ti anem ku qaya, padingwan ku bai ku, nengi niliyam ku yu! melilizaq ti bai mipil.

semanu patudan nani, nizu nengi niliyam niaq, wanayka, Raynguan  pama uatani tinsu, temuzus tu Rabi ti, paazasan patudan semanu ti tu tinsu, qasiR ti muman nidutiq na anem ku, melabu simsuqas ay kaput melimek ti mai tu sunsuni ngid ipil, maipil niaq meliyam tu nangan ku kebalan kitut ay taqsian mala tu tiimin, Ruipil mai sazemaken anem ku, maken maqezaq ti nani melilizaq medudutiq ti iku, sanuan ku ti ya bai ku mala iku tu tiimin, semanu bai ku yau ti malisimpu ya ta damuan ay lazat, ngid suna timaikuan temanan, muRin ti iku mipil tu sikawman na bai ku, Raqana, tangi nani qalizaqan ku ay deddan.

今天去參加全國噶瑪蘭族語朗讀比賽，一大早奶奶就叫我起床整理行李等老師。我們一起前往舉辦的學校休息室，大家換上族服加強練習，進入比賽的教室、登上講台，我更緊張，不過，我鼓起勇氣朗讀，唸很大聲也很順，結束後台下掌聲熱烈，我心情也舒坦許多。

到了傍晚，我聽到噶瑪蘭族小學組第一名是我的名字，高興地跳起來，趕緊撥電話跟奶奶說，奶奶說部落的人都集中在家裡要迎接他回來，我聽到哭了，今天是我最快樂的日子。