朗聲四起

melizaq iku temulis, melizaq iku tu nitulisan ku qaya, melizaq iku temayta tu ’daq temulis qaya, wanayka nitulisan na ’daq nizu nengi taytan, nizu Rebuan na ’daq, nitulisan ku ay mai tu lazat meRebu, metawa ’daq temayta tu nitulisan ku, mai taRaw anem ku, suppaRan ku wanma aiku melizaq tu nitulisan ku. azu maken ngid Rebu ’daq, qanaquni ya! pameng ma iku metawa, mazemun kaput ku temaqsi semanu timaikuan, maken mai isu tumayta tu babuy semaqay ni? tumayta iku tu babuy sayzi! wanayka, tulis ka tu ussiq baby zin na maken sukaw nitemulis ku. kasianem iku babuy ma niana ’nay zin na anem ku? tulisan ku tu uzusa kitut ay mamitulun tunek, unung na ti na babuy ’nay. talibeng na unung tulisan ku tu azu mengiyas ay ngibiR na ti babuy ’nay. ta babaw tu kiya tunekan ku tu Raya tu kiya mamitulun uzusa, mata na ti na babuy ’nay. tulisan ku tu Raya ay mamitulun izip na ti banuy ’nay. ta Rayan ay mamitulun ta tati ta kinilan na tulisan ku tu uzusa matutumis, kayal na ti na babuy ’nay, tuRuz na tulisan ku tu liqud, mulepun ti ussiq babuy nitulis ku, melizaq anem ku, nengi taytan ku nitulis ku.

timangu semanu patudan “niana zau?” mai sasetaR tu babuy, ussa babuy nitulisan zau zin na timaikuan, niana ya! zin na kaput ku temaqsi, niz ti mawtu temayta tu nitulisan ku, metawtawa ti kaput ku temayta tu nitulisan ku, qatawan zin na patudan seRay kaput ku temaqsi, wanayka nengi qalilizaqan ay saqawRatan ay babuy, tatezuma kenasianem nengi zin na patudan bunay tu anem ku. Rayngu iku temulis, wanayka, qawqawman melizaq iku temulis. melizaq iku tu nisanu na patudan tulis ka tu aneman numi ay tulis zin na, nazau qawka nengi iku temulis tu aneman ku ay satulisan, temulis iku tu ta aneman ku ay, temulis iku tu paRaman ay, temulis iku tu simau, yau qaya temulis iku tu unduba na taqsian, maRaRames nitulisan ku, taytan na ti na patudan meRetut, semanu patudan nitulis ku manna zau qenataqan ay damu. yau kelisa semanu patudan, tulis ka tu madded ta kinilan su ay kaput temaqsi zin na, tulis ika tu bilu ay zin na patudan, timangu dadadas nitulis ku tu qenabalang ku temaqsi, tenes qumnut mai ti sikawma timaikuan, semasu kaput ku sukaw taytan nitulis ku, wanayka qawqawman melizaq iku temulis.

我喜歡畫畫，而我畫的不管是什麼，沒有人說好看，我還是喜歡畫畫。然而，我卻連豬都畫不好。我畫一個小圓圈，點了兩點當豬鼻子，小圓圈外面又畫一個中圓圈，再點兩點當豬眼睛，再畫上一個大圓圈是豬身體，在小圓圈外面兩邊畫上耳朵，最後在大圓圈後面畫上尾巴，一隻豬就完成了。

大家說我的畫很好笑，但我對畫畫的熱情不減。自由畫是我發揮創意的時候。我畫了墓地、牧場和花，但老師說我畫的像廢掉的部落。大家都說我畫的太難看，我還是喜歡畫畫。