朗聲四起

Yakay ku tatama, ai tuaaganenga, lakatuase mubalriw mua kavay kacekelane Kucapungane, lrikape ki daane si lriivay ku ubulu ki kahui lini. kikay kiamatikaikay ka nacekele Kucapungane kudra natalaalibi ku daane si latinukucingalrane ka ladaane si tatulrisilrisiane, lakamani ku sidrama ini si karakace, sadulrudulruananaku naumuana laiya, lamuanga makanemelenga ku vai.

SakaNiciwbi ki mialrealre ki valru ki tuki, lakaynganay siulri papia kay Rinari, ai kainguainunga ki kadalranane si acilay, ai, kaynganaiyana naw tarakela lukamiauaubu iya. Ai, kaimaka siaulringa lakitekepe, latinulanguy asitalunemele ki kaadravane, sakelanga lribate ki sakadrusa ka cekele ki Sukucapungane kavay Tulalekelre, nguakaiyana ku taludrusa ku tatalrubalreane ini. Ladreele kuini talilrawdru lakaadrawnga ku acilay, lakaimaka talrubalre, lakathathiburu ku kidremedreme, ala lritumanaku iya iya.

Lakatuase mua kuidra ki nataludru taylebe kipalenay ki udale, ai, kaisiaacilay, kaisidrinki, kaisiaraita, lakadepenge ku laimay ini, si manuguligiligilinga, lamiaka kiapucaemane ki maadraw ku alualu, sanakasilraw lriretese, ala lritumanaku iya si tubi, langidrakaale si ngiveevele kaculu, si pidruru kitubi ki Tuaumase, kay lripacadhaku, palribulaili laiya. Lamulebelebe ku dingiva ini si kakucingalre pakatuase ku dingiva naw palalavana laiya, lapakatuase ku vaga ini “ maadraw kay acilay palribulaili”, ala tarumara ku talragi ini ku waapece, lakatuase kikawriva ki labaibay ini si lalake ini, lakatuase mua ki taraedredrepe pelaela, ala kirimunga madawdawlu si suragele ku rarukudrane si mua ku tamapusale si bangate ku butay. Lukaita mua malramalra, lriatara pacay ki gulruane miakayakay ku maadraw ku alualu ki kinaumasane ini, lailuku ku alualu ku apakanane, si lacalrisi, tapadringikiane si tipay, lakasaasa kuini labaibay ini.

Lakamani kikay lukipadradresengane ku sapaapcay, tarakiasasuaraw madu pelaela ki takisacane ki taraedredrepe, ki suabiuingi, lakaipalribate ki saudriudripiane ki zikange. Latara ngipapadulru madu ku sangiragelanane madu, lumuinuanenga, saarakaiyane madu ngipapalrabulu, kipalribulu. saniange kay dingiva si raita, dringiki si acilay, amani ku sapanianiakane.

從陷入危險當中知道狀況，並能向救難機構報案，用最有效的方法，才能在七十二小時黃金時間保住生命。

要隨身攜帶最基本的生活用具，如手機、藥品、飲用水等等，遇到緊急時可自我防衛和幫助急難中的人，尤其是通訊器材，要常更新，備載備用，對自己對個人，都是每日備忘的。