朗聲四起

alja’ niamadju. aicu a’a’edriyan ’i’asiinu a na’itjauci’el tua nu qemuin a vat na tjingkuy sa’esai, meqaljemeqem a paru ta zarami. savai’e a ’emavulj ta ’ina tu pavayan ta tjaljayan na tjingkuy, manu tevelain na ’ina a mayatucu, “ awa izua ’u vat na tjingkuy, sau vai’u a matjai su vuvu a ’ivataq. ”

pasusuan a’ai na ’ina sa vai’ a ’emavulj ta vat na tjingkuy a matavuvu a vavayan, ljauwa tjumaljan na vuvu a vavayan a mayatucu, “ avan ti tjama a izua a vat natjingkuy. ” sa vai’ a ’emavulj ta vat na tjingkuy a mata ’ama. ljauwa, mayatucu a ’ama, “ ’ipa’imi ti sukaka, tjara izua a vat na tjingkuy nimadju. ” sa, vai’ a mata kaka, sapapaulingavi a kaka tu sine’auljan na ’ama timadju a ’emavulj ta vat na tjingkuy. azua a kaka ta lemadenga ta ’ai nimadju, nasaljivalaw a mudingan sa tevela, “ tua izua namaitazuwa nemanga nia’en, paljiljii ti ’ina, tjara izua sa’amaya a nimadju, pai lja! ”

sa vai’ a cemi’el aza timadju a ’a’edriyan a mata ’ina. manu avan a sidjauljan ta ’emamaljiyan na ’ina, sa’irivu a pasizangal timadju a mayatucu “ nu ne’a i ne’a,’umaya tu su si’aqutjaw aravac, ti sise’ulungan ti gunggungan! awa sun a venalid aravac a mangtjez a ’emavulj tazua a vat na tjingkuy? ”

ta’irivuanan azua ’a’edriyan, ’ivauvalj a masirumaljiyan a qivu, “ pay ’emasitucu tja nanguaq a palaing anga a ’ivadaq nuri izua ’u ’inasaljianga a nanemangamanga,’isavut anga ’en a cema’av! ” , sa semeljudj ta siqunu sa vu’evu’e ta djilj nimadju. manu, aza naparavac a ’a’edriyan masan drail i sauniuni. sa’a drail tucu tjaljatjenglayan a ’isavuta a cema’av ta nemangamanga na qaliqali, avan cu ’inasizuanan cu a tjauci’el.

 

有個頑皮的孩子聽說只要把南瓜子搗碎煮，便會甜如砂糖。他向母親索取南瓜種子，母親要他向祖母要，但祖母卻說他的父親才有南瓜種子，孩子便去向自己父親要，但父親卻請他找哥哥要，但哥哥也沒有，請他去向母親要！因此孩子再度向母親請求，母親生氣斥責，孩子被罵，氣憤難平的說：「以後不管是誰的東西，我都要偷！」他抓起了刀子往屁股刺，變成了猴子。

猴子喜歡偷吃人的東西，據說就是由此而來的。