朗聲四起

aring sasan beta gbyan, ita kwara c’oli nyu maki babaw uraw ga maki sa’ing myasa ci lpyung ta, utux ga wagi, utux ga byacing.

aring ci mgebu sasan lga mnaga ta mhtuw wagi kwara c’oli. ini pcyax wagi naga, siyang ci tuli gebuw sasan ga c’oli mosa m’omah mayah. cmyax wagi lga, kwara la’i utux sali ga tuli mosa m’was biru kwara la. yaba yaya ru mama yata ta ga tuli mosa mtiyaw tanux kwara. nanak bkis ta utux alang ga naha mlahang alang ru sali.

cmyax babaw kayan ku wagi lga, t’aring m’was kwara piyit, maki utux sa’ing kwalit ga mlaka beh babaw kayan. hying cbing ru kpiray ga mlaka yugiy beh babaw phpah. kwara ksinu rgyax ga mwah mani k’man ru mwah nbuw ’sya syaw gong. kwara piyit ga mwah mani kwi ru mtisan babaw khoni. cmyax babaw kayan ku wagi lga, myasa ci lungan naha kwara c’oli, ksinu, piyit ru kwiy, kwara nyu m’yanux babaw uraw hani.

tehok mbiya hogan rgyax ru miyuk bcilung wagi lga, t’aring mku’ung kwara babaw kayan ru uraw la. kwara lla’i ga masu m’was biru ru mwah sali kwara la. yaba yaya, mama yata ru ana ima mnwah mtiyaw tanux ga, biya wagi lga mwah sali kwara la. kwara c’oli mnwah m’omah mayah ga, biya wagi lga mosa mwah sali uyi la. biya wagi lga mku’ung kayan la, ana piyit ru ana ksinu ga mosa mhngiy libuw sali naha kwara la. biya wagi ru mku’ung kayan lga, ana hying cbing ru kwara kpiray lga waya mhngi ubuw naha kwara.

mbiya wagi lga mhtuw byacing babaw kayan la, mku’ung kwara babaw uraw ru mhngi mtiyaw kwara c’oli ru ksinu. nanak ci takay cyu lokah calay m’ was maha, abi la! abi la! abi kwara la! nyu mhtuw byacing la, abi kwara la.

ana ga, mhtuw byacing mku’ung kayan ga, t’aring mhtuw gbyan ku olit, m’u, puk ru yapit. olit ga wahan mani m’u, m’u ga wahan kmiyak puk, yapit ga wahan cmu patus likuy Tayal.

wagi ru byacing ga lpyung ita c’oli. wagi ru byacing ga lpyung kwara ksinu, lpyung kwara piyit. maki wagi lga tuli ta mtiyaw kwara ta, mhtuw byaving lga mhngiy kwara babaw uraw la.

一大清早，所有人都在等待太陽。最早起床去工作的是農夫。太陽出來，小朋友要去上學，爸爸媽媽和叔叔嬸嬸會到外面工作，部落的老人會在家裡顧家。小鳥唱歌，老鷹飛翔，蜜蜂和蝴蝶在花朵中飛舞，動物都出來吃草和喝水，飛鳥出來找蟲吃，大地充滿歡樂。

當太陽下山、沈入大海，天空籠罩在黑暗中。放學的小朋友、出外工作的人都回到家裡，小鳥和動物都回到巢穴、窩裡休息。月亮高掛在夜空，大地萬物都要休息，只有青蛙不斷地吟唱。