朗聲四起

Ku nadruma, ikay ki Ngudradrekay kadrua kuini wabaebalre nawpathaele ki marudrawdrangeli amia, kaikiadreedreme ku tualalake, asiluiyane, kialalra ku lalake, adravane ka sawavalay, ka labaibay, kialalra itavanane, kialarla ki cekele, kialalra ki latama ki latina lini. Kadrua ku pathaethaele ngilralraingi turamuru.

Kikaynga sasuainga ku tapapiane mulatadre kibulru, kipaisu, mudraatane ki kapairangane, wathingalengata kipelaela, kisidruru, kasamali ku latangimiamiane ki lavavalake ki langukathabarane, adravane ka tarudraudrangenga. Makakalra ku kilra madu ku tiatina ku sidruru maduane, kaikialalralalra ka lalakeli, masamadraku, mukuludraku, kualrinay ku apangimiane.

Kikay umaumase lukelanga ki tabalribalrithane ki caili, tarayakay ku taakabalrithane ku kinaumasane si gathimi si tangivelevelane ku kakuakudhane. Lakamani ku dradreele madu ka tualalake ka tarabulrubulru, ai wadradreele madu tukalithane sirapale, sanapangilisi su, lringiracuku, si lriarukipakilringaw. Sanakatuase mulatadre kiulraw, matiaukuludrunga turamuru. Lrisitalragi ku kaimathariri, kane ku malisi, pasalriw ki umaumase, kitusinalreme kipakadula, kipapacay, lakamani, lukaiana pakilringaw, kiasamula madu, tukalithane, thingale ku kualrialri ini, ku murikaykay ini, laparalubu, sangiiluku kaithivalraw ki kadalranane ini.

Kunadruma saikaiyanata lregelrege, kiaruthukuana ki cekele, ki suakiwkay, ki laretesane, lakaduay masiraparapale; kikaynga amaninga kikay pakakucingalre ki takibulruane, lakakadrua ku paisu ku sapakibulraune, puasamalra ki kapairangane,kiadailinga ki amukiwkadhane, ai ku maadradrawanga, talikaamani kay tualalake ka ngisasingikay vetha ku kidredreme lini, ku tayngeane amani kuini wabalribalrithi ka kiapualra ki beate ini, lapapia ki gathimi si kakudhane, lakaikirimu arakay ku mathariri ku gathimi ngikakidremedreme, lutukucingalre su ki tingise ku tasikingane, lakaitukucingalre ki tuathariri ku takaumaumasane, amani ku papianga ki turamurane, laaralisiane ngangane si baebalre pathaele ki tama ki tina.

Makuciacingalre kay tangivelvelane ki manemanenga, madha ngibabalrebalre, madha balrebalre ki marudrange su, kidreedrema ngiabalay!

一個男孩或女孩在進入少年階段，容易在心性上有性格上的衝擊，引導不對可能帶來叛逆的言行，讓做父母的擔心和措手不及。比較於過去原鄉的生活環境，沒有這樣的社會和家庭現象。

所以要小心引導陪伴，面臨成長過程中的子女或族人，順利經過這人生的關卡，讓他們正常的邁入成熟的生命領域。