朗聲四起

Yakay ku tayelreelreane ki tarudrawdrange ki suakiwkay, lukaNiciwbi lasenay lukatasukusukubane, yakay lukatuase kipaelre mubaabadhane seasenay, yakay lumua ki marudrarudrange, ki tualrisisiisi, yakay lusenay ki matuase kay kaumasane senay kipusaw saasa ki watubitubi, lakisamula kela kicaucakuane padulru ku asenadhane lini, madalame madu ku senay lini.

Ai, lukibulrubulru ku lrikaasenadhane, makalra ku kidremedreme lini, adravane padulrunga ku sinisi ku senay, yakaiyana ku kaimadalame, yakay ku kaipalrayngi, lakualri ku kayciw rathudu ku amanilringa ku senay.

Asiluiyane, thathatha kay senay ki sukucapungane, wakela ki iday pulrabale, lakaikamanemane ka senay ku pilripilri, lumakapilringa ku senay, wamuanga ki atusaiyaiyane madrikidrikisi, malrulrupi madu, ai, lukabilrilinga, mapaceacepe, ala kirimunga kudra asenadhane.

Ku sidrumane ku senay amani kikay, lalrualrumedhane, pusilrivulu, lrailray marulangi, ailalai, niuane, inalaina, ualaiyui, unanesiunane, sinikaulremane, lrumi, nalrupalumiange, ai madadalamenga ki lralresay.

Ala mavalavala ku lriakualay, ku wailuku, si wacaerebecebenga, kamania lukiiya, kainakuwadulru laiya, mainua ku amia, muakuludra ku amia, wamuanga kuini si kaithingalenga ku apangimiane; lavavangalre kakadra, saasa ku tarapasenay, ala kirimunga tukasenadhane si ngimia, matidaadalame, adiidirivane, mamalramalra si kathariringa ku gathimi si akuesaynga ku senay.

Mathaithariringa tusapunguduane ki tarudrawdrange, salaelangane ki masepesepele, sapasidramane ki masulrisulri, sasasane ki watubitubi, sasibulrubulruane ki kiarararagay, makalra ku saiyaiya madu.

Lakamani, tataratukucingalre kisudalru ki tarudrawdrange, asiluiyane, makalra ku abulru lini, mathariri ku senay lini, thathatha ku akibulruane madu kikay vaga si lasenayta ka bibibilrili liniane.

要聽老人唱古調，只有去有教會的老人團契，雖然老人意見很多，表示他們是有心的，尤其是動作緩慢的老年人，給他們唱歌就是最不容易損害身體的一種身心靈的運動。

所以他們樂此不疲，只要有受邀，他們會義不容辭，用力用心參加，達到自娛娛人的功效，我喜歡聽老人唱歌，唱他們的故事。