朗聲四起

Kayaasane tuamaelaelanenga kay saseverane, lukaikaculu turamuru, makecelrenga turamuru, saniange sakaicigace, paramuru ku takakecelrane, lapasaabu sanakataabelengane ka lregelrege, tawdreeleta amia ku laumaumase, lamakitu katuase mulregelrege dreele kuini tapasaabuane, kilringaw ku tangimiamiane ki lasuakay takakecelrane gaykuku. 

Kay paasabu, lukela ki salelebe ki taleketane ki kecelrane si latakuudaudale, makakelrete ku pasaabu. talikamaadrawnga ku taakabalrithane kadrangedrange kay kadaengane, lakamani ku pangitutuluku, pasamaimali kela kay maadraw kay valrigi, kay cengelraw si takakecelrane. lakaadradreelaneta si thingale padulru ku sangipapalakebane lukela ku sapapacay si pamatikuru mitaane ka laumaumase.  

Dreela kikay tapasaabuane, pakalisi ki latarapawlacelacenge ki sualregelrege, papacay ki lawalapulapu ki kaange, laasaulra ku sakualriali lini, lakitubitubi ku akipalribulane ki suakungukuane, ku tuaramuru ku kinaumasane, tapangale ku magulru si kacaeme si nguniakane, ku lakadalranane lakacelrepe, kalisi, kaimaka ngukay ku latangukaiyane masasawlri ki laumaumase, mathariri ludreelane, ai, luparamuru, lumakakalrale, kaikaakaesadhane, lrikaamatikuruane madu.

Latakibulru ku pacengecenge ku tapangimiamiane cekecekele, kaiarakay ku lripakalisi ki saseverane ki kadaengane, kilibake kay ki taikaiyaneta kay kadaengane, vaeva kay kadaengane, sanangilisi, si paramuru ku culuane, paramuru ku kecelrane, lrikaasaulrane ku zaisange si niaketa, takaingubebebelenge dreele, tapulringaw kilalra ku mathariri ku sapelaelane tapathingalane mitaane ki tarakingikiw si kasulivalivate lukakalapasaabuane si lukakalavaiyane si lukakalavalriganenga.

Amia ku vaga, lukaisu kilalra ku tapelaelane ki tarudraudrange lritaramulisi su; lukaita kipawtenga ku takingikivane ki malrigili, lritaramatikuru madu. takilibake ki kadaengane lripalakebe musuane, palakebe ki tacekecekelane su, pakiragay ki sakacekele su, lrikisibulrubulruta ki wabekace kay kadaengane ka Tuaumase.