朗聲四起

gaga nqu cnlalu qa Tayal cqani, lalu na laqi ga m’ cubuy lalu bnheci, sklayan nqa m’ cubuy saying lalu, nanu sqa lalu laqi knerin, ini ga lalu laqi mlikuy ga cyan glasux, mehung ga inbuyan lalu na yaba, ini ga lalu na yaya, pnlwanan ta lalu ta nanak ga nanak, ini sgiy lalu bkis nya hiya, ini ga sgyun ta slalu na lalu nya, pinbaqay ta nyan sbiru mehung.

ini ptnaq snyan ta lalu na mlikuy ro knerin qa cquliq Tayal, qabax lalu cqani ga knahul sinbilan na kinbkisan ta, inbuyan ta smi lalu qabax. gaga na cnlalu cqani hiya hintgan llaqi lga knahul yaya ro yaya, ini ga yutas ro yaki naha cpung smi lalu. ana ga cingan cmpung ga yaya ro yaya na laqi cqani, pisan nqa yutas miq lalu, siga smwal yaya na laqi, kyaqa pinqutan cquliq kman maha “ blaq calay lalu na laqi qani, ima snyan? snyukan kman maha, snyan lalu qa yutas nya ”. smi lalu laqi milkuy ga mc’ ubuy binkesan krahu, mrhuw, ini ga lalu na motux na Tayal, nanu yaca musa pisang naha krahu, smi lalu laqi knerin ga snyan naha lalu musa pqasun qabax naha.

gringan puqing yaw na lalu qani ga, nyan naha ini qbaqi qabax naha, kihuy cin ’ringan yaw nya ga, cka qabax lalu ga knsyugan lalu na qqaya na cinbwanan. maki lalu phpah ro kkhuniq, lalu na qsinux, lalu na qqaya tyawun qba, kbabaw na yaw ro kntyux naha yaw na cinbwanan, ini ga lalu na innglung naha.

pisang cinqani kman, Masing Hayung, lalu na Masing qani ga masing mkan ta btunux. qani ga lalu na mlikuy. kruma lalu na mlikuy ga snyan naha Yumin, ini ga Behuy, qani ga lalu na khoniq ro kayal

mbinah ga maki lalu knahul slalu naha, lalu na slalu sgyun naha, ini plawa calay lalu naha, kyaqa pqutan maha hmcwa maki slalu su, cmyuk kmayan maha, nyan ini qbaqi. nanu yasa mrkyas, ini ga tmsuqan pinsqunan laga rema maki slalu qani la. mbinah slalu qani ga nyan tbcyan yaw na lalu ccquliq, baha hmcwa lalu nyan maki cka na qalang qani ga kpiyux tnaq lalu naha. slalu na qutux qutux hi ga maki gringan yaw nya, maki hkngyan ro gmilan yaw nya, kpiyux slalu qani ga si ktayux rinqyasan, ini ga qsliqan naha smi slalu qani, qabax slalu qani ga p’ aras mqlinga ro ssyqan calay.

泰雅族的名制為親子連名制，由兩個名合成，即子或女的名字在前，後面連以生父或母之名。泰雅族人的名字男女各異，名字都是延襲採用。命名在出生之後由父母或祖父母決定，但尊輩具最後決定權。男嬰的命名，依古代偉人、頭目、英雄者之名，則可以像他們一樣偉大；女嬰之名亦多取大家喜歡者之名。

名字的意義，探其來源，多半是借用自然物之名。比如說：馬幸·哈勇這個名字，馬幸就是鑿子的，這是男生的名字。男生的名字也會使用：茄苳、風等等。