朗聲四起

mnwah saku mluw mama mu musa mqbuyang kya rgyax Tabuh, ’lwan kya ni mama mu qutux krahu balay ru qhuniq balay na hlapaw, bwazyun balay uzi.

halan minblaq kmagaw ni mama mu qu qbzyangan niya qasa, ru rasun saku niya musa smbays hiya.

misan sami tayhuk kya ga, tnaq kbalay tutu’ na patus niya’ qu mama mu, ru suqun niya skura kwara qu tutu’ niya lga, rima gbyan la, misu balay ga mqwas kwara qu yapit, nyuw mlata kwara la.

aw ga, cyux maki sa qara qhuniq qu aki niya qbzyangan hya, ana nyux rima mlata qu yapit ga, si qihul mkaraw qhuniq aki musa sa qara qhuniq na’, ini tayhuk sa qara qhuniq na ga, sikta qu cyux hmwaw qu mama mu qasa maha waw! la, aw’ baq sa aki nyuw mwah maniq bway hlapaw qu yapit lga, minlu tayhuk sa ptpaqan niya qu mama mu, ini qbaq hmkuy qu yapit hya, ru si balay ptpaq sa turu ni mama mu la, baha ini ’nkux uzi qu mama mu lpi!

ga mnkux uzi na hnwaw ni mama mu qu yapit qasa, ru wal si gluw mgyay la.

wal rima kawxun na yapit qu mama mu ru, ini usa qmbuzyang sa gbyan qasa la. si sami abi kya sa tatak kinbalay ni mama mu qasa, ru lmnglung squ zyuaw na yapit qasa. 

kinsuxan niya lga, cyuw tl’ ngux kugi’ mama mu, ru s’ usa niya pkhmu sa tpaqan yapit qasa, ki’ a wal sa mawpuw qu minkhmu niya kugi tay kya. tmasuq pkhmu kugi lga, musa sami plaw rahaw niya la.

cyugal ryax sami kya lga, halan myan mita lawzi qu qbzyangan niya qasa lga, sikata balay cyux pkhmu’ kya balay qu yapit la! 

kintan mmu balay qani hya ay! snhyun mamu?

我跟叔叔去達波山狩獵，叔叔發現一顆非常粗壯的櫻桃樹，而且果子非常豐碩。

叔叔就去整理他要埋伏的位置，然後帶著我去陪他。

我們剛到的時候，叔叔一直在裝著獵槍的彈藥，直到他把子彈都裝完後，都已經天黑了，沒多久，飛鼠便開始鳴叫，開始出動了。

但是叔叔要埋伏的地方是在樹枝上，雖然飛鼠都已經出動，但是他還是想要爬到樹上去，還沒有到達樹枝的地方，就聽見叔叔「哇！」的一聲大叫著。原來飛鼠想要來吃櫻桃，剛好叔叔也爬到了飛鼠停留的位置上，飛鼠又不會轉彎，就落在叔叔的背上，我叔叔怎麼會不被嚇到呢！而那隻飛鼠受到叔叔叫聲的驚嚇，直接跑掉了。

由於叔叔被飛鼠嚇到，所以那天晚上就沒有再去埋伏狩獵了。我們只好在叔叔所搭的獵寮睡了一夜，並思考著那隻飛鼠的事情。

第二天叔叔把釘子磨尖，然後就拿去釘在那棵樹幹上，他大概釘了十幾根釘子，他釘完了之後，我們就去巡視他的陷阱。

我們在那裡三天後，就去看叔叔埋伏的地方，果然有一隻飛鼠被釘在那！

這可是我親眼看見的喔！你相信嗎？