朗聲四起

mama’ mu Yukan hya’ ga mtzyu’ pgan pspat kawas nya’ la. blaq nya’ ktan qu cyux mzzingat mari’ kwara’ qu mmrkyas, ru musa’ tkura’ sa ttara’ cyux squzi ka wagiq na qlcing qasa. blaq nya’ balay ktan ru musa’ ’mimaw sa cyux gmnaw’ mari’ qasa. kmal maha “aki saku’ mwah gmnaw’ uzi ku?” maha. swalan kwara’ na lelaqi’ lru musa’ ’mimaw kya’ uzi la. ga bali nya’ baqun kwara’ qu gaga’ na pgnawgan mari’ qasa hya’.

nanu’ galun nya’ qu mari’ lga, wal nya’ si gba’ qu mari’ ru wal mqzinah, ru “pip!” sawn na saybang maha “nyux su’ min’uqu’ la”, kmal mama Yukan maha “han! aw ga!” biqan mari’ na gluw nya’ ru, aki nya’ pawsun sa kari’ qu mari’ ga minzmagal qmara’ ru tkrawn nya’ qu mari’ lga, “pip!” sawn lawzi na saybang maha “nyux su’ min’uqu’ lawzi la” ru “ han! aw ga! ” maha lawzi qu mama’ Yukan qasa.

galun nya’ lawzi qu mari’ ru musa’ tkura’ sa kari’ qasa lga, sqhut na squliq ru mtakuy kwara’ nha’. ktan lga “pip!” sawn lawzi na saybang maha “nyux su’ min’uqu’ lawzi la”. ktan qu mama’ Yukan qasa lga, yaqih hazi’ ktan rqyas nya’ la. lmnglung maha “ aw squliq qasa nanak qu mwah qmihuy ru swa’ kun lawzi qu yaqih sawn nya’ lawzi ” maha lmnglung la. ru “nway qeri’” maha lmnglung lawzi. ru si nya’ sr’i lawzi qu inlungan nya’ qasa. sawn kasa lga kya qutux qu gluw na sngusun nha’ nyux maras mari’, ru nyux mkura’ tay ki hiya’ aki musa’ tkura’ mari’, ga sqihut nya’ la, ini’ nya’ hrqani ru maymaw mtakuy qu squliq qasa la. sawn kasa lga, “pip!” sawn lawzi na saybang maha “nyux su’ min’uqu’ lawzi la”, t’uqu’ lqu mama’ Yukan maha “ iyat saku’ pgnaw’ la, sayqihun saku’ nha’! ” maha ru, nyux si uwah, ini’ gnaw’ la.

Yukan叔叔已經六十八歲，他喜歡看著年輕人搶球，然後投入籃框裡的樣子。他也想要一起打球，但不知道籃球的規則。他拿球跑，裁判對他「嗶！」犯規。他拿球又踏了五步投籃，被裁判「嗶！」犯規。Yukan叔叔投球時，被別人阻擋造成兩個人摔倒，裁判又「嗶！」他犯規，Yukan叔叔心想：「怎麼是我的錯？」Yukan叔叔把情緒給壓了下來，有個人帶球朝著他的方向準備投籃，但被他阻擋，但對方沒有摔倒，裁判又「嗶！」犯規！Yukan叔叔生氣便不玩了！