ray roe:oeh pangih ha’a:ap honaehnge: ila. So: ’okay pakakreng kitkita’ ka ’arap ’am ’okay Sahoeroi:. ’oka’ o ray hina’azem ma’an ka pangih haysiya biSbiS bazae’en, yako tikot ka ralom ’ana ’inowan ma’ ’amkay ngowipani.

haba:an tiS’a’i’ a tomal, ’ana hiya’ ma’ ’okay honasamez. kaSangayan roSa’ ’ilaS kin honaehnge: honay pinak’iya’zawan kakrowaSekan ’aewhay mina. noka kapa’onhaelan laleke:en koSa’ ta’ila tapanpanra:an, yako ma’ tikot sowiti’, ma’az’azem naehan. wasal o! ma’ ’isahini ya:o ’iya’inoSa’, ma’ ka’oSa’an ’oyaeh! ’oka’ o, yako ’am nak’ino’ manabih ka tatini’? ’akoey ka hin’az’azem ma’ ’awmomza’ ila. hina’azem komoSa’ ta’oSa’aw takalhael-- yako ’am rima’! ’ana rima’ ma’ monhael nanaw.

waw wasal! wasal naka minkoringan homiba: ka ’ima hes’ezan tinal’izaeh kayba:en, hopong ka ’ima tiS’aliyaS, kinSiyae’ mam homlal. ’ima ’okay honasamez ba:i’ naka kamamanra:an mam papa’aehae’, maltikal ka totoS nisiya, siya noka kin kaSikar ’aliman ila.

kayzaeh bazae’en! ba:i’ SomoSoyap ka kinmae’iyaehan. ’ima ’iya’zaw ka lalowa’ mowa:i’ pontikol, ’iniya’zaw mowa:i’ ray basang, maraS ka ’ima ’awmomza’. yako maSnganga’ rima’ ray wasal ka ’inawpo’! ya:o tani ’ima kayzaeh kabazae’en tani lalowa’ pampama’en.

’okik ra:ami, noka kapa’onhaelan pinakakSiyae’an hawka’ ila saboeh. ralom rima’ ray kanman kahehnakan, pawbis’ol ’iyakin. yako minkakamoeh mamasa’, lalowa’ mowa:i’ ila naehan. ray wasal kamaSal naka hayza’ ka heklaw ’ima kitoyae’en, ’angiS a tomal ’am homoehoeh ’iyakin, rima’ ray wasal ’i:zo’! yako tikot ’aewhay ila ka pinanra:an, naka lomobikol hiwa’en noka ’ima sinsinamoehan bato’, ’abiSbiSin naka zemles bazae’en. ’isahini ralom bazae’en ’iya’zaw a tomal! ma’an pangih ’abiSbiSin ’oka’ ila ka wa’is Silangoy. yako ’araSen ray wasal, ’insa’an toliyab ’insa’an Sa:boe’. soka yako komakabaeh ka tatini’ paSi’ayo’en ila? yako ’ana ’am komilwa’is ma’ ’okaS nanaw. ’aehae’ ka:i’ Sa’, “yako ’okay paylal’oz ila!”

ma’an kapa’onhaelan Sahoero: mowa:i’ malibih ’iyakin. basang kayzaeh ray roe:oeh hayza’ ka pangih nanaw. yako ra:am nonak miyatabin ka kalangoyan, papaSoS ka ’ima haeba:an ila? mayhael ya:o ’am ’iya’azem a tomal!

漫長的暑假待在冷氣房也不是辦法。朋友邀約，我還躊躇著。海啊！不正是最想去、也最需要去的地方？該怎麼跟家人說？愈猶豫就愈煩悶。這迫使我決定，我要去！反正就這麼一次！

湛藍的海，像披上閃耀的薄紗，興奮地跳舞。淘氣的風惡作劇，掀起裙襬，便又害羞地平息。好舒服啊！風輕拂，沁涼的海水襲來，帶走我的焦慮。閉上眼，展開雙臂，擁抱著海！陶醉的我，不自覺往前走。

忽然朋友的笑聲全消失了。海水灌入呼吸道，嗆的睜開眼，又一波海浪朝我襲來！下方彷彿有一隻老虎，想將我拖進海底！一急失去平衡，被尖物割傷了小腿。痛楚竄遍全身，海水冷得刺骨，我想游回岸邊，但腳傷讓我使不上力，只能努力掙扎！難道這是我撒謊跑來海邊的懲罰？連撐住眼皮的力氣都沒有，只能說對不起。

幸好朋友們將我救了回來，除了在小腿上的傷，身體沒大礙。但我想，再也不敢了吧！以後出遊，我一定會更注意安全。