109 年全國語文競賽原住民族語朗讀【拉阿魯哇語】 國小學生組 編號 4 號
macarʉmʉ siarataisa

hliahlumia mahlicaliva cucu’una, ma kani’i hlicalivana pi hlitakumacua hlisasangarʉ, maru mʉmʉa kuhlitakumacua lʉʉ’ ʉ. aucaucani hliasasangara ihlaisa takuanganʉa aucaucani lʉ’ʉ ihlaisa kiapuhlua siiatatara.

mʉlʉvʉ ihlata aariaari arataisa, aralangʉlangʉlangʉ. uamia sala’a ahliacuvungana aralangʉlangʉ, hliarukararamangu ka tʉmʉ. ucanika pautuamacuaku, uka’a kupatapauhla caalʉ, uka’a kuualava sala’a.

maiusʉpʉ, marapihli varu’u siangusipa; matakalala marapihli siarataisa, siarataisana sitakualangʉlangʉ, mavacangʉa siasumiaku, ucaniika apasapa kuavacangʉ; mucua mavacanguisa ia mucukuhluaku mahlukua kani’i sasaruana, kuavacanguisa uka’a macuisa tukucuku.

kiariari hlitarutʉahlʉaku cacihli masalangʉsangʉ mamaini ahlaina, marapihliakuisana pakikucu, ucaniika kutalakakukua ihlku, pasamia kana’a tamuucu takulaicʉ tikiku. marua cucu’i kihlahlamu ihlaku “ maci kuariataraʉhla tʉkʉ, kucikia pakarangatʉ, uananaia maiakaka takacicihli. ” kani’i mrakakacuaku. pausu’ulu takacicihli uka’a sitahlamiamia uvurapasamia, maruacucu’u amihla umahlikua kani’ina marahlicalivau mi’arahlasʉ takuliacʉtʉkʉ rianʉ masiangusipaul.

macahliaku kani’i hliparakaka tʉkʉna, pi siaucaniisa siangusipina, macahliaku sipalavalʉna kuucani siarataisa, marua siasasangarʉa marua lʉʉ’ ʉ, siangusipa iniciki pi mavacangʉ, umaruamia hlicaliva siangusipana, tumamahlʉngʉ sisasangarʉ.

kukia atʉhlʉngʉ kariisa cucu’u, ausi hliahlikuaisa ihlau ahla hlialivalʉaisa ihlau, cucu’uia pisipatuhluhlakia, umahlikua takacicihli mii,maci aunani ia tuahlʉ pihlipalava,tuahlʉaku maritalaʉhla, cucumacuisa macahlia ihlauna kupautuamacu ihlau.

ucani siangusipa cucu’una pisitakuaili macarʉmʉ, macarʉmʉ sipatakalala, macarʉmʉ siarataisa, kani’i macarʉmʉ masiangusipana, marasihlangʉ siangusipa cucu’u. maci cucuari tuahlu pakituru hlicaliva, ma kana’a macarʉmʉ mavacangʉ tukucuna.

109 年全國語文競賽原住民族語朗讀【拉阿魯哇語】 國小學生組 編號 4 號
成長的痛

成長是每個人必須經歷的過程,過程有成功的快樂,也有失敗的淚水。每一次的歡樂,是正能量、每一次的淚水,是悲傷的宣洩

隨著一天天的成長,也越來越艱難。前面的道路充滿了坎坷,也佈滿了荊棘,但是我堅信,沒有翻不過的山,沒有走不完的路。

破滅,為了新生;破繭,為了成長;成長是痛苦的,我是幸運的,但也不幸;幸運的是我來到這個世界,不幸的是,我沒有真正的朋友。

我以前遇到一個非常美麗的女孩,我為她付出全部,可是她無動於衷,那時我的心非常的痛。有人說:「這些會變成你的歷程,痛苦、傷心,都是你生命的養分」。

我知道這些痛苦,會成為生命中的一部分,改變給予我們的不僅是成長,有歡笑也有淚水,生命才有豐富多彩,讓我們用經歷豐富人生,創造快樂。

不要在意別人怎麽說,真正懂你的人絕不會否定你。人的一生是痛的循環,破繭的痛,成長的痛,成長就像是蛻皮。是痛苦,是流血,有風險,有失敗;但也是期待,變得成熟與美麗。

這些痛在人的一生,成為人生活中的光亮。如果以後我可以笑著回憶從前,那一場友誼之痛。

文章資訊
文章年度109
文章編號4
文章組別國小
文章語別拉阿魯哇語
族語標題macarʉmʉ siarataisa
漢語標題成長的痛
文章作者游仁貴
漢語摘要