109 年全國語文競賽原住民族語朗讀【賽夏語】 國小學生組 編號 3 號
homoeloey ka ’alipa’

haba:an So: kakiSka:atan patae’aes maSangay ila, yami korkoring ma’ lobih kilapa: ray taew’an ni baki’. sa’sa’ih ka hahila: tani minminatini’ rima’ ’ila hato: marmaraw homoeloey ka ’alipa’, ’aehae’ hahila: monpoSal manakiS rima’ ray koko:ol kin hopay!

haba:an korkoring ’ana ’okay kiSka:at ’akoey mina ka kapatawawen. ririm’aenan ’i’ini’i 6 kaSepe:an ’oya’ mowa:i’ ila tomi’itol Sa’ “’in’itol ila! Sa’ila timasa’, Sasapoeh ka repe:! monkaekamoeh min’itol yako, So: ’okay ’in’itol makSa’ ka’angangen ni ’oya’!

kakhayza’an mamowa’ ka pazay, haba:an So: kipazay ila, yami korkoring kamatatilhaehael Somobowaw ka kinipazay ’ini mama’ ray kapaSbetan ’am pahoroS ka ka:mez. So: ma’ngel o ’angangen noka tatini’!

ka:mez ’alibihin pahila:en ray rape:. hae:wan ila toktoklon hemeken noka ka’pa’, ririm’aenan ’altikalen hawaren ’aehae’ ra:an ’aehae’ ra:an pahila:en. ’aehae’ kaSepe:an pahinibihin. nakhara ’okik honaehnge: bazae’en hi koko’ ’okay ’omo’oe: ila “’am’amoeh pahinibih ka pazay! hayno’ ila…”  sa’sa’ih ka hahila: mahila: ka pazay tomoktokol ka pazay.    haba:an hila:an kama’om’omoral So: ’okay kita’ ma’gel tomokol, hemek ka pazay. pazay ’oralen yami ni koko’ ’okay o ’angangen ’oyaeh!

koko’ ’okay ki yaba’ ’omangang nanaw ’okay Sebet! ’oya’ ’angiS! siya So: bi’i: mari’ hawaw SiSawik ’iniya’om miyahaehae:ae’ mam homangih! kita’en ’ae’ay pezngesen ila! ’ana ’ang’angangen Sebeten noka tatini’, yami korkoring nakhara ’okik tikot, honha:i’ ma’ sawa’ ila rima’ ila Siyae’ kil ’aehael.

hini ma’an kina:at ni ’oya’ ma’an pinabnabih. siya maSriyae’ a tomal hi ka’oya’, kayaba’ ki kakoko’ nisya. ’isa:a’ manabih nisiya ray ’ima korkoring ka kin’i’iyaeh. yako somingozaw hi ’oya’ “So’o minkoringan, ’ampowa’ rima’ homoeloey ka ’alipa’? ’aehae’ hahila: monpoSal manakiS rima’ koko:ol ’okik hopay ay? ’oya’ Sa’ “’ampowa’ ’okik hopay! honay taew’an rengreng ’angangen ni koko’, yaba’. nak’ino’ So: ’okay kita’ o Sawikin ni ’oya’, hiya’ ’am honay taew’an? sa’owaz o yako So: ni ’oya’ takhini’in yako ma’ kayni.

sa’owaz kakhayza’an kamakiSka:at haba:an maSangay ’okik Sapang minaSangay, kin ’akoey kapatawawen. ’i:wa’ ’oya’ komoSa’ kin hopay!

109 年全國語文競賽原住民族語朗讀【賽夏語】 國小學生組 編號 3 號
拉杉木

放暑假了,我們小孩回到五峰祖父的家。每天跟著兄長去marmaraw拉杉木。

暑假小孩有很多工作,清晨不到6點媽媽就來叫:「起床去洗臉!然後去掃地!」我立刻起來,如果不起來會被媽媽罵。

以前種稻,割稻時小孩要幫忙搬運割好的稻子給長輩們,如果動作太慢就會被長輩罵!

稻穀帶回曬穀場上曬,傍晚就堆成小山用塑膠布蓋住。早上就掀開耙梳成一行一行的,大約每一個小時就會聽見’okay奶奶的叫喚:「趕快翻動稻穀了!去哪裡了呢!」夏天下午常會下雨,一不注意讓稻穀淋濕了,我們又被’okay奶奶責罵了。

’okay的媽媽很兇,她如果生氣就拿細竹枝打我們,我們小孩子也不懂得怕,一下子就笑著找其他人去玩了!

這些是我媽媽的故事,她常說她小時候的生活。我問她說:「妳是女生,為什麼要去拉杉木呢?一天爬兩趟不辛苦嗎?」 她說:「可是待在家裡天天被打罵,誰要待在家裡呢?」真的!若我被媽媽這樣對待我也不要。

以前學生放暑假了也有這麼多工作要做,難怪媽媽說:「很累!」

文章資訊
文章年度109
文章編號3
文章組別國小
文章語別賽夏語
族語標題homoeloey ka ’alipa’
漢語標題拉杉木
文章作者夏麗玲
漢語摘要